Bybelse wysheid

DR. ANNES NEL

Psalm 13:2: “Hoe lank gaan U my nog vergeet, Here? Vir altyd? Hoe lank gaan U nog van my af wegkyk?”

Sir John Bowring was ’n begaafde man. Hy kon vyf tale praat en was die vierde goewerneur van Hongkong. Hy het baie boeke en gesange geskryf. Op ’n dag, terwyl hy per boot langs die kus van China gereis het, het hy ’n stad gesien wat deur ’n aardbewing verwoes is. Tussen die puin het die kruis van ’n verwoeste kerk nog regop gestaan. Daardie beeld het hom diep geraak. Later het hy die bekende lied geskryf: “In the Cross of Christ I glory, towering o’er the wrecks of time.”

Hierdie woorde bring troos, maar wat gebeur wanneer jou eie lewe in puin lê? Baie mense ken die gevoel dat daar meer vrae as antwoorde is wanneer ’n kind ernstig siek word, ’n geliefde skielik sterf, iemand sy eie lewe neem, of rampe duisende mense tref.

Selfs mense wat op God vertrou, worstel met hierdie vrae. Die digter van Psalm 13 het dieselfde pyn beleef. Job het geweldige lyding ervaar met baie vrae en min antwoorde.

In Jesus het God die kruis in die puinhope van ons bestaan geplant. Hy verstaan ons pyn. Ons ly nooit alleen nie, want Christus het self die pad van lyding geloop om ons te verseker van God se teenwoordigheid, selfs in die donkerste tye.

Here, dankie dat U by ons bly wanneer die lewe vol pyn en onbeantwoorde vrae is. Amen.