Bybelse wysheid

DR. ANNES NEL

Job 16:7: “Nou het God my afgetakel; Hy het my hele gesin uitgewis.”

Mense praat dikwels van “die geduld van Job”. In Job 16 sien ons min geduld. Job is seergemaak, kwaad en verward. Hy protesteer. Sy grootste stryd is nie fisies nie, maar geestelik. Hy verstaan nie hoe God, wat die onskuldiges moet beskerm, nou voel soos iemand wat hom aanval nie.

In Job 16:6-14 gebruik Job sterk en pynlike beelde. Hy beskryf God onder andere soos ’n wilde dier wat sy prooi verskeur, soos ’n soldaat wat genadeloos aanval en soos ’n boogskutter wat hom as ’n teiken gebruik. Hy voel soos ’n verpletterde kruik. God het hom openlik verneder. Mense spot hom, beledig hom en draai teen hom. Job voel dat God sy vernietiging georkestreer het.

Tog hou Job vas aan sy onskuld. Hy glo hy het niks gedoen wat hierdie lyding verdien nie (16:17).

C.S. Lewis het ná sy vrou se dood in A Grief Observed ook eerlik geskryf oor sy pyn en gevoel van verlatenheid. Dit het vir hom gevoel asof God die deur toeslaan wanneer ons Hom die nodigste het.

Die Bybel maak nie ons klaaglied stil nie. Job gee woorde aan die pyn wat baie mense voel: “Here, hoekom doen U dit aan my?” Onthou: God is groot genoeg om ons klagtes en pyn te hoor.

Here, help ons om ons diepste pyn eerlik na U toe te bring. Amen.