Bybelse wysheid

DR. ANNES NEL

Job 1:21: “Die Here het gegee en die Here het geneem. Prys die Naam van die Here.”

Richard Wurmbrand vertel van ’n 18-jarige Russiese meisie wat tydens die kommunistiese tydperk ter dood veroordeel is. Sy sou om middernag deur ’n vuurpeloton doodgeskiet word. Toe die wagte haar kom haal, het die ander gevangenes gehuil, maar sy het rustig en sonder vrees geloop. Toe haar voetstappe in die donker verdwyn, het hulle haar hoor sê: “Ek glo in God, die Almagtige Vader. . . en in die ewige lewe.”

Hoe bly iemand getrou in so ’n situasie? Hoe dien ons God wanneer gebede onbeantwoord lyk, wanneer siekte, verlies en dood nog steeds heers? Die boek van Job verwerp dat goeie mense altyd beloon word en slegte mense altyd gestraf word. Geloof waarborg nie rykdom of sukses nie.

In Jesus Christus sien ons onskuldige lyding. God ly saam met ons. In Jesus het God self menslike pyn beleef. Jürgen Moltmann skryf dat Jesus sy Vader se afwesigheid ervaar het. Die Vader het die dood van sy Seun beleef. God verstaan ons lyding, omdat Hy self gely het.

Jesus was onskuldig, maar Hy het vir ons sondes gesterf (1 Petrus 3:18). Terwyl ons nog sondaars was, het Christus vir ons gesterf (Romeine 5:6-10). Deur sy lyding ontvang ons vergifnis, liefde en die ewige lewe. Daarom dien ons God vrywillig, nie uit vrees of vir beloning nie, maar omdat Hy die genadige God is.

Here, help ons om U in alle seisoene van die lewe getrou te dien. Amen.