Bybelse wysheid

DR. ANNES NEL

Efesiërs 2:1-3: “Julle was dood as gevolg van julle oortredings en sondes wat voorheen julle lewenswyse gekenmerk het. Vanweë ons sondige natuur sou ons, net soos die ander mense, deur God gestraf moes word.”

Ek is dankbaar dat ek hierdie stadium in my lewe bereik het. Ek hoef nie meer CV’s te skryf om werk te kry nie. Deesdae moet mense hulself op papier bemark. Dan kom die onderhoud waar jy jouself verder moet bemark!

Die Bybel skets egter ’n heel ander prentjie van ons. In Efesiërs 2:1-3 lees ons dat ons geestelik dood was in ons sondes. Ons het van God af weggeloop en ons doel gemis. Ons het die waardes van die wêreld gevolg, onder die invloed van die duiwel gestaan en ons eie begeertes nagejaag (2:2). Dis ’n drievoudige slawerny: Die wêreld, Satan en die self. Sonde is nie net iets wat ons doen nie; dit leef in ons. Ons is van nature sondaars onder God se oordeel (2:3). Dis nie ’n mooi rekord nie. Dis ’n eerlike maar pynlike diagnose. Hierdie waarheid behoort ons nederig te maak en tot groter begrip vir ander te lei.

Paulus praat egter in die verlede tyd. Dit is wie ons was, nie wie ons nou is nie. Onthou vandag: Jy word nie meer deur jou verlede bepaal nie. Deur God se genade het daar verandering gekom – nuwe lewe, vergifnis en hoop.

Here, dankie dat U my gered het en nuwe lewe gegee het. Amen.