Bybelse wysheid

DR. ANNES NEL

Efesiërs 1:22-23: “Hy het alles onder sy voete gestel en Hom as Hoof oor alles aan die kerk gegee, die kerk wat sy liggaam is, die volheid van Hom wat alles in almal vervul . . .”

Jesus het alle mag en gesag. Hierdie gesag is nie ver of onpersoonlik nie. Dit is tot voordeel van die kerk. Die gelowiges is Christus se liggaam. Dit beteken ons deel in sy dood, sy opstanding en sy plek in die hemel (2:5-7). As sy volheid word ons gevul met sy lewende teenwoordigheid. Vir die eerste nie-Joodse lesers, ’n klein geloofsgemeenskap, was dit baie belangrik. Hulle Here regeer oor elke mag, elke heerser en elke geestelike krag – nou en vir altyd. Geen president, minister, koning of selfs Satan, geen naam, is of sal ooit bo Jesus wees nie.

In die kerk, in die geskiedenis en in ons eie harte sien ons nie altyd hierdie heerskappy nie. Daar is konflik, lyding en selfs opstand teen God. Karl Barth het gesê dat die hede soms eensaam kan voel. Tog bly Christus by ons, selfs in sulke tye. Hy vergewe ons en dra ons, want alle gesag is aan Hom gegee (Matteus 28:18-20).

In die boek Openbaring ly die kerk, maar hulle sing ook die lied van die Lam van God, wat aan God se regterhand is en die finale oorwinning het (7:10-17).

Niks kan dit verander nie. Jesus is ons Here. Hy regeer oor die wêreld, die geskiedenis en ons lewens.

Here, ons juig, want U is altyd op die troon. Amen.