Bybelse wysheid

DR. ANNES NEL

Hebreërs 12:12,13: “Versterk daarom die slap hande en die lam knieë en loop die reguit pad. Dan sal wat lam is, nie uit lit raak nie, maar gesond word.”

Die Christelike lewe voel soms soos ’n maraton. Daar is tye wanneer ons krag min raak en ons hopeloos voel. 

Die brief aan die Hebreërs praat met gelowiges wat besig is om moed te verloor. Dit waarsku dat sommige, soos dié in die woestyn (Hebreërs 3-4), nie die eindpunt sal bereik as hulle tou opgooi nie. Geloof beteken om oor en oor te kies om God te vertrou (Hebreërs 10:22; 11:1).

Die Here wil nie hê dat ons alleen moet stap nie. Een van die duidelike boodskappe in Hebreërs is dat ons vir mekaar moet sorg. Ons moet mekaar aanmoedig tot liefde en goeie dade en aanhou om bymekaar te kom om te aanbid (Hebreërs 10:24–25). Wanneer iemand se geloof swak raak, help die gemeenskap om hulle te versterk.

Dink aan moeë reisigers wat amper by die huis is en mekaar moed inpraat, omdat hulle geliefdes daar wag. Dit is ook ons hoop. ’n Groot skare getuies het ons vooruitgegaan (Hebreërs 12:1). Hulle is die bewys vir ons dat die pad, al is dit moeilik, die moeite werd is.

Wie naby jou het vandag aanmoediging nodig? Stap saam met hulle en versterk hulle in geloof.

Here, gee my oë om dié raak te sien wat moeg en moedeloos is. Amen.