Bybelse wysheid

DR. ANNES NEL

Jakobus 5:14-16: As daar iemand van julle is wat siek is, moet hy die ouderlinge van die gemeente laat kom, en hulle moet vir hom bid… As hy gesondig het, sal dit hom vergewe word. Bely julle sondes eerlik teenoor mekaar en bid vir mekaar, sodat julle gesond kan word.

Dikwels wil ons vinnige antwoorde en duidelike resultate hê. Henri Nouwen sê daar is twee soorte gebede. ’n Gebed van kleingeloof fokus daarop om presies te kry wat ons vra. Dit wil dadelik resultate sien en probeer die uitkoms beheer. Hierdie manier van bid laat min ruimte vir vertroue in God. ’n Gebed van hoop is anders. Dit vertrou God, selfs al weet ons nie wat die uitkoms gaan wees nie. Dit vra nie vir bewyse of waarborge nie. Dit rus in die sekerheid dat God goed en getrou is.

Jakobus moedig ons aan om so te bid. Wanneer ons vir siekes bid, vra ons vir genesing, maar ons vertrou ook God met die uitkoms. Soms kom genesing fisies; ander kere kom dit as vrede, herstel van verhoudings of krag in swaarkry. Paulus het dit ervaar met sy “doring in die vlees” (2 Kor. 12).

Gebed is ’n daad van oorgawe en hoop. Ons probeer nie God beheer of Hom dwing nie. Ons gee onsself aan Hom oor en vertrou dat Hy weet wat die beste is. Of genesing kom soos ons verwag of nie, God bly aan die werk.

Here, help my om op U te vertrou, selfs wanneer ek nie weet wat gaan gebeur nie. Amen.