Bybelse wysheid

DR. ANNES NEL

Hebreërs 13:3: “Dink aan die gevangenes asof julle self ook gevangenes is, en aan dié wat mishandel word asof julle self ook mishandel word.”

’n Seer ingegroeide toonnael eis al jou aandag. So kan swaarkry maak dat ons net op onsself fokus. Dit is maklik om so besig met ons eie probleme te wee4s dat ons van ander vergeet. Hierdie gedeelte roep ons om gelowiges wat ly, te onthou en vir hulle om te gee – asof ons saam met hulle ly.

Die eerste Christene het baie swaar gekry. Hulle is beledig, het hul besittings verloor en is eenkant toe geskuif. Tog het hulle nie net op hulself gefokus nie. Hulle het omgegee vir ander en saam met hulle swaargekry. Hulle pyn het nie hul harte toegemaak nie; inteendeel, dit het dit oopgemaak.

Martin Luther herinner ons: “Ons lyding is nie die naam lyding werd as ons dit met die lyding van Christus vergelyk nie.” Dit gee perspektief. Ons swaarkry is werklik, maar dit moet ons nie keer om vir ander om te gee nie. Christus het vir ons gely en Hy roep ons om sy medelye te vertoon.

Onthou vandag: Jy is deel van ’n groter liggaam. Gelowiges oraloor die wêreld ly onder vervolging en verlies. Moenie van hulle vergeet nie. Bid vir hulle en ondersteun hulle waar jy kan. Laat jou swaarkry jou hart oopmaak, nie toemaak nie.

Here, help my om te bid, om te gee en iets te doen vir dié wat vir hulle geloof ly. Amen.