Bybelse wysheid

DR. ANNES NEL

1 Korintiërs 12:26: “As een lid ly, ly al die lede saam; en as een lid geëer word, is al die lede saam bly.”

Henri Nouwen skryf dat ons dikwels dink dat leiers ver van mense is of bo hulle staan. Hy sê dis nie hoe geestelike leierskap moet lyk nie. Ware leierskap vertoon liefde en deernis. Hierdie soort leierskap help ander om te groei, moedig hulle aan en help hulle om gawes te ontdek wat hulle dalk nie weet hulle het nie. Dit tel mense op en help hulle om hulle goddelike roeping uit te leef.

Niemand is belangriker as iemand anders in die kerk nie. Ons behoort almal aan een liggaam – die liggaam van Christus – en elke persoon het ’n rol om te speel. Party mense word geroep om te lei, maar dit maak hulle nie beter as ander nie. Christus is die Hoof. Ons volg Hom terwyl ons na sy Gees luister.

Soos ’n menslike liggaam: as een deel seerkry, voel die hele liggaam dit. As een deel bly is, deel almal in die vreugde. Wanneer iemand swaarkry weens verlies, siekte, mislukking of sonde, reageer ons met deernis, nederigheid en gebed. Ons stap saam met hulle en onthou dat ons ook genade nodig het. Wanneer iemand geseën word of sy gawes gebruik, vier ons saam met hulle en dank God.

Hierdie soort medelye – in hartseer en vreugde – is die hart van die Christelike gemeenskap.

Here, leer my om met deernis te lei en lief te hê. Amen.