Bybelse wysheid

DR. ANNES NEL

Galasiërs 6:1: “Broers, as iemand in die een of ander sonde val, moet julle wat julle deur die Gees laat lei, so iemand in ’n gees van sagmoedigheid reghelp. Maar pas op: jy kan self ook in versoeking kom.”

Niemand hou daarvan dat hulle foute uitgewys word nie. Ons eerste reaksie is gewoonlik om onsself te verdedig. Selfs wanneer iemand ons met liefde reghelp, kan ons nog steeds verkeerd reageer. Partykeer verhard ons houding, want dit is moeilik om te erken dat ons verkeerd was.

Paulus skryf aan gelowiges wat deur die Heilige Gees gelei word (6:1). Hy weet dat mense in die geloof kan afdwaal. In Galasiërs 5:13-21 lees ons van sondes wat selfs onder gelowiges kan voorkom. Dit wys hoe maklik ons sondige natuur weer oorneem.

In plaas daarvan om mekaar hard te behandel, leer Paulus dat ons mekaar moet reghelp met twee eienskappe. Die eerste is sagmoedigheid. As ons deur die Gees leef, sal ons ook die vrug van die Gees, soos liefde, vriendelikheid en geduld, dra teenoor iemand wat afgedwaal het (5:22).

Die tweede is nederigheid. Ons moet onthou dat ons ook kan struikel en val. Ons is nie beter as ander nie. Ons almal is nog op pad. 

JP Versteeg sê: Ons kan iemand net regtig help as ons met sagtheid langs hom of haar staan. Ware hulp kan nooit uit ’n posisie van “ek-is-beter-as-jy” gegee word nie.

Here, leer my deur U Gees hoe om iemand te help wat geval het. Amen.