Bybelse wysheid

DR. ANNES NEL

Matteus 18:15: “As jou broer verkeerd opgetree het teen jou, gaan wys hom tereg waar julle eenkant alleen is. As hy na jou luister, het jy jou broer teruggewen.”

In 1957 het Willie Jonker geskryf: En as jou broeder sondig. Die boek is in 1977 feitlik onveranderd herdruk. Hy praat oor ’n moeilike saak, naamlik dissipline in die kerk.

Ons praat nie graag daaroor nie. Party mense het dit hard en genadeloos beleef – dikwels net oor sekere sondes soos swangerskap voor die huwelik of egskeiding. Ander sondes is dikwels geïgnoreer, soos gierigheid, skinder, om iemand se karakter te vermoor, God se Naam te misbruik of oneerlikheid in besigheid.

In Matteus 18 leer Jesus dat ons persoonlik met iemand moet praat wat verkeerd doen. Die doel is nie om die persoon te veroordeel en weg te stoot nie, maar om hom terug te bring. God is bly wanneer iemand wat afgedwaal het, weer gevind word.

Jonker sê Jesus het geweet gelowiges sal nog met sonde worstel. Ons groei almal stadig in ons geloof. God werk deur sy Gees elke dag in ons. Hy leer, troos, waarsku en lei ons om meer aan Christus toegewy te wees. Daarvoor gebruik Hy ook mense. Hy skryf dat wanneer Christene verantwoordelikheid vir mekaar neem, veral oor sonde, groei hulle nader aan mekaar, word nederiger en draai hulle weg van dit wat hulle van Christus wegtrek. Laat mense wat van die Here weggeloop het, vandag jou omgee beleef.

Here, maak my ’n instrument van U liefde. Amen.