Bybelse wysheid

DR. ANNES NEL

1 Korintiërs 13:5-6: “Die liefde … soek nie sy eie belang nie … verbly hom nie oor onreg nie, maar verheug hom oor die waarheid.”

Paulus praat met mense wat die gawes van die Gees verkeerd verstaan het. Dit het tot ’n groot fout gelei. Hulle het nie die kerk as die liggaam van Christus gesien nie. Wanneer dit gebeur, hou ons op om aandag aan ander te gee. Die lewe draai dan net om onsself. Ons fokus op ons eie behoeftes, gevoelens en belangrikheid.

Hoe behandel ons mekaar sodat die liggaam opgebou kan word? Die antwoord is liefde. 

A.A. van Ruler skryf dat liefde nie bly is oor verkeerde dinge nie. Liefde help ons om duidelik tussen goed en kwaad te onderskei. Dit wil hê dat die kwaad moet verdwyn en dat die goeie dit moet vervang.

Dietrich Bonhoeffer het geskryf dat die doel van vriendskap bepaal word deur God se wil vir die ander persoon. Eenvoudig gestel, vra ons hoe ons verhoudings help dat God se plan in ander se lewens groei. 

In plaas daarvan om te vra wat ons daaruit kry, vra ons hoe ons liefde God se wil in ander dien. Daarom gaan liefde oor toewyding aan wat goed is vir ander volgens God se wil. Dit kyk na buite, nie na binne nie. Dit dien, bou op en versterk ander sodat hulle kan groei tot wat God vir hulle bedoel het.

Here, help my deur U Gees om só vir ander om te gee dat hulle U wil sal ontdek. Amen.