Bybelse wysheid

DR. ANNES NEL

Klaagliedere 1:14: “My sondes is saamgebind tot ’n juk; hulle is saamgevleg deur die hand van die Here.”

Lyding kom op baie maniere. Partykeer verstaan ons dit glad nie. Ons kan nie verduidelik hoekom dit gebeur nie. In sulke oomblikke is dit dikwels beter om stil te bly as om heeltyd antwoorde te soek. Daar is ook tye wanneer swaarkry duidelik is. Ons weet dit is die gevolg van ons eie keuses.

In Klaagliedere (1:12-15) sien die skrywer duidelik dat die Here dit gebring het. Sy woorde is vol pyn. Hy beskryf hoe hulle soos druiwe in ’n parskuip fyngedruk word (1:15), oorweldig deur die hand van God se dissipline (1:14). Hy is alleen en swak (1:13). Dit voel asof al die pyn op hom geval het.

Baie keer lyk swaarkry sinloos. Wanneer ons egter besef dat ons pyn gekoppel is aan ons eie sonde en ongehoorsaamheid, kan ons eerlik na die Here toe kom en ons sonde bely. Die skrywer bely dat God reg is en dat sy oordeel regverdig is.

Daar is hoop. Die straf wat ons moes dra, is op Jesus Christus gelê. Deur God se genade is die juk van ons skouers gelig en op Jesus geplaas. Kyk vandag weg van jouself en kyk na sy kruis en opstanding. Dit was vir jou. Plaas jou vertroue in Hom. Jy is nou vry van die las van sonde. Wat ’n Verlosser!

Here, ek prys U dat U my sonde en my straf gedra het. Amen.