Bybelse wysheid

DR. ANNES NEL

Eksodus 14:30: “Die Here het Israel daardie dag gered van Egipte.”

Die Here wou hê dat die Egiptiese farao en sy mense moes erken dat Hy werklik die Here is (14:4, 18). Soms het die Egiptenaars en die farao besef dat God besig was om te werk. Hier erken die Egiptenaars selfs dat die Here vir Israel veg (14:25).

Dit het nie lank gehou nie. Oor en oor het hulle Hom teëgestaan. Hulle weiering om Hom te erken, het uiteindelik tot hul ondergang gelei. Die boodskap is duidelik: Mense wat aanhou om God te weerstaan, selfs nadat hulle sy mag gesien het, sal uiteindelik tot niet gaan.

Oor Israel se redding was daar nooit enige twyfel nie. Tog was die proses vir hulle baie belangrik. 

Hulle moes leer dat die Here sy woord hou. Hulle moes sien dat geen menslike mag sterker as God se mag is nie. Hulle moes ook verstaan dat dit nutteloos is om die Here te weerstaan.

Aanvanklik het hulle gekla en getwyfel (14:10-12). Toe leer God hulle om stil te wees en op Hom te vertrou (14:13-14). Die Here het sy doel bereik. Israel het sy groot mag gesien en besef dat Hy die Here is (14:31).

In Christus het die finale oorwinning oor alle magte en gesag ons redding gebring. Ons oorwinnende Here praat steeds met ons. Draai vandag na Hom toe en bely dat Hy jou Here is.

Here, dankie vir U voortdurende liefde. Ek bely dat U my Here is. Amen.