Bybelse wysheid

DR. ANNES NEL

Eksodus 13:22: “Die wolkkolom bedags en die vuurkolom snags het altyd voor die volk gebly.”

Die reis het begin. Die Israeliete was uiteindelik vry uit Egipte. Vryheid het nie beteken dat die pad vorentoe maklik sou wees nie. Die kortste roete sou deur die land van die Filistyne gegaan het, maar dan sou daar waarskynlik oorlog wees. Die mense was nie gereed daarvoor nie. As hulle nou moes veg, kon hulle bang word en verlang om terug te gaan na Egipte toe. Hy lei hulle daarom op ’n ander pad – deur die woestyn.

Die woestyn was ook nie ’n maklike plek nie. Daar sou honger, dors en onsekerheid wees. Daar moes hulle iets baie belangrik leer: die Here is by hulle en Hy beskerm hulle.

God het nie elke hindernis uit hulle pad weggevat nie, maar Hy het hulle ook nie alleen gelos nie. Die wolkkolom in die dag en die vuurkolom in die nag was tekens van sy teenwoordigheid: Hy lei en Hy is naby.

In Christus sien ons die openbaring van God se teenwoordigheid. Sy naam is Immanuel – God met ons. God het onder ons kom woon. Deur sy Gees woon Hy nou in ons. Vader, Seun en Heilige Gees is by jou. Onthou dit vandag: Geloof beteken nie ’n lewe sonder probleme nie. Dit beteken dat ons kan vertrou dat Hy ook in moeilike tye naby is en ons lei.

Here, dankie dat U by ons is, selfs wanneer ons pad vol hindernisse en ompaaie is. Amen.