Bybelse wysheid

DR. ANNES NEL

Eksodus 13:3: “Onthou die dag waarop julle uit Egipte, uit die plek van slawerny, weggetrek het, want dit is deur sy groot mag dat die Here julle daaruit bevry het.”

John Westerhoff se bekende boek Will Our Children Have Faith? kritiseer die manier waarop godsdiensonderrig dikwels plaasvind. Geloof kan nie net soos ’n skoolvak geleer word nie. In Sondagskool leer kinders dikwels net inligting oor geloof. Hulle kan Bybelstories, leerstellings en tradisies ken, maar dit beteken nie noodwendig dat hulle werklik geloof ervaar nie. 

Volgens Westerhoff groei geloof die beste binne ’n lewende gemeenskap wat doen wat dit glo. Daarom beklemtoon hy dat geloof gevorm word wanneer kinders deelneem aan ’n gemeente wat saam aanbid en getuig.

Die belangrikheid om geloof aan die volgende geslag oor te dra, sien ons in Eksodus 12 en 13. Hierdie gedeeltes beskryf hoe die eersgeborenes aan die Here toegewy word. Die rede hiervoor is dat God die Israeliete uit slawerny in Egipte bevry het (13:3). Die Fees van Ongesuurde Brood hou ook verband met hierdie gebeurtenis (12:17-20, 39). Wanneer hierdie feeste gevier word, vra kinders vrae. Dit gee aan ouers en die geloofsgemeenskap die verantwoordelikheid om weer die verhaal van God se redding te vertel (13:14-16).

Walter Brueggemann het later Westerhoff se vraag omgedraai: “Sal ons geloof kinders hê?” Wat dra ons aan ons kinders oor? Is dit iets wat die moeite werd is om te glo en te leef?

Here, gee my die moed om u verlossing met my kinders en kleinkinders te deel. Amen.