Bybelse wysheid

DR. ANNES NEL

Eksodus 12:26,27: “As julle kinders sou vra: ‘Wat beteken hierdie verpligting?’ moet julle sê: Dit is ’n paasoffer aan die Here…”

Die nuus is negatief. Ons hoor van oorloë, families wat uitmekaar val, geweld, mense wat te vroeg sterf, korrupsie wat versprei en ’n toekoms wat onseker lyk. Dit voel soms asof die wêreld al hoe donkerder word. Ons kan maklik moed verloor.

Ons hoor ook mense sê: “Daar is geen toekoms hier . . . niks gaan verander nie. . . hoekom probeer?” As kinders dit aanhoudend hoor, begin hulle ook glo dat daar min hoop is. ’n Hele geslag kan begin glo dat daar min hoop is. Kinders is nie gemaak om sonder hoop te leef nie. 

Die Bybel leer dat geloof by die huis begin. Toe God die Paasfees ingestel het, moes ouers vir hul kinders vertel hoe Hy sy volk uit Egipte bevry het. Hierdie verhaal het die kinders geleer dat God red, beskerm en ’n nuwe begin gee.

Hierdie bevryding is vlees en bloed gegee in Jesus Christus. Deur Jesus se kruis en opstanding gee God vir ons vergifnis, nuwe lewe en egte hoop. Wanneer alles donker lyk, wys Hy vir ons dat God steeds by ons is en dat sy liefde sterker is as sonde en dood. Laat ons vormers van hoop wees en ons kinders vertel van God se sorg, sy getrouheid en reddende krag in Jesus Christus.

Here Jesus, help ons om ons kinders van U verlossing te leer sodat hulle met hoop kan leef. Amen.