Bybelse wysheid

DR. ANNES NEL

Galasiërs 5:13,14: “Julle is tot vryheid geroep. Moet net nie julle vryheid misbruik as ’n verskoning om sonde te doen nie, maar dien mekaar in liefde.”

Die gemeentes in Galasië het begin wegbeweeg van die eenvoudige waarheid en vryheid van die evangelie. Party het geglo hulle moet sekere wette onderhou om regverdig voor God te wees. Paulus sê dat dit God se genade ondermyn. Ons kan nie met die Gees begin en dan in ons eie krag klaarmaak nie (Gal. 3:2-3). Ons kan nie uit slawerny bevry word en dan weer teruggaan nie (Gal. 4:9). As Christus ons vrygemaak het, is ons werklik vry (Gal. 5:1).

Ander het vryheid op ’n ander manier verkeerd verstaan. Hulle het gedink vryheid beteken om te doen wat jy wil. Deur woorde en dade het hulle mekaar gebyt en verskeur (Gal. 5:15, 26). In plaas van die vrug van die Gees het hulle die werke van die sondige natuur gedra (Gal. 5:19-21).

Paulus sê die hele wet word saamgevat in een woord: Liefde (Gal. 5:14). Ware vryheid is nie om jouself te dien nie, maar om mekaar nederig te dien (Gal. 5:13). In Christus se kerk is ons nie heersers nie, maar dienaars van mekaar.

J.P. Versteeg skryf dat iemand wat in liefde leef, werklik vry is, want hy of sy is nie meer vasgevang in selfsug nie. Liefde breek die kringloop van selfgerigtheid. Vryheid verruil nie liefde vir selfsug nie.

Here, leer ons deur u Gees om met liefde te dien. Amen.