Bybelse wysheid

DR. ANNES NEL

1 Johannes 2:22: “Wie is die leuenaar anders as hy wat nie wil erken dat Jesus werklik die Christus is nie? Hý is die antichris, hy wat nie die Vader en die Seun wil erken nie.”

Ek dink dikwels voor die Here aan mense wat ly omdat hulle Jesus Christus bely. Party vlug uit hul dorpe. Ander sit in tronkselle. Sommige word stilgemaak deur dreigemente en ander betaal met hul lewens. Sommige steek hulle geloof vir hul eie families weg. 

Hulle getuienis konfronteer ons met ’n ernstige vraag: Wie is Jesus vir ons? 

Ons leef in vryheid, in staat om openlik te praat. Tog bring gemak sy eie gevaar. Die kerk moet oral en altyd die waarheid van die evangelie beskerm. Johannes het aan gelowiges geskryf wat deur verkeerde opvattings mislei is. 

Sekere mense het ontken dat Jesus die ewige Seun van God is wat mens geword het. Johannes het reguit gepraat, want ons verlossing was op die spel.

As Christus net ’n goeie leermeester is, kan Hy ons nie red nie. As Hy nie werklik God is nie, het sy kruis geen krag om ons met die Vader te versoen nie. Hy is God met ons – heilig, regverdig en vol genade. Deur sy offer word ons sondes vergewe en ons verhouding met God herstel.

In ’n wêreld wat verdraagsaamheid bo waarheid stel, moet ons met liefde leef en standvastig staan. Die kerk bestaan deur die waarheid wat in Jesus geopenbaar is. Laat ons aan Hom vashou sonder skaamte of kompromie.

Getroue God, hou ons standvastig in die ware belydenis van u Seun. Amen.