Bybelse wysheid

DR. ANNES NEL

Handelinge 20:28: “Pas julleself op en die hele kudde wat die Heilige Gees onder julle sorg gestel het. Soos wagters ’n kudde versorg, so moet julle die gemeente van God versorg wat Hy vir Hom verkry het deur die bloed van sy eie Seun.”

Die kerk is ’n gawe van God. Ons praat maklik daaroor, maar ons brille is dikwels gekleur. Ons ervarings kleur ons denke. As ons seergekry het, words ons harte hard. As ons vreugde beleef het, praat ons met dankbaarheid. 

Tog bly die kerk meer as ons ervaring. Dit is God se werk.

Ons verwag soms dat almal moet glo, die Bybel goed moet ken en altyd sal saamwerk. Ons droom van eenheid, liefde en groei. Ons weet egter ook hoe gebroke gemeentes kan wees. Mense verskil. Mense faal. Ons vra: Is hierdie droom nie onrealisties nie?

Dan herinner die Here ons: Die kerk is nie ons s’n nie. Dit is syne. Dit is met die kosbare bloed van Jesus Christus gekoop. Hy is die Eienaar. Hy het dit lief. Selfs wanneer die gemeente swak en onvolmaak is, behoort dit aan Hom.

Karl Barth het gesê dat die kerk ’n venster van die hemel op aarde is. Laat ons daarom met respek en liefde na die gemeente kyk. Laat ons bid, dien en bou. Mag ons iets van die hemel sien waar gebroke mense deur genade heelgemaak word.

Here, dankie vir u kerk. Leer my om dit lief te hê soos U. Amen.