Bybelse wysheid

DR. ANNES NEL

Matteus 21:19: “Toe Hy ’n alleenstaande vyeboom langs die pad sien, gaan Hy daarheen, maar Hy het niks anders as blare daaraan gekry nie. Hy sê toe vir die boom: ‘Jy sal in der ewigheid nooit weer vrugte dra nie’.”

 

In Matteus 21:12-22 sien ons twee groepe mense. Die eerste groep is baie godsdienstig. Hulle ken die Skrif goed. Hulle het Jesus se wonderwerke gesien. Tog is hulle blind. Hulle godsdienstige idees en stelsels keer hulle om Hom as Here te aanvaar. Sy waardes is te vreemd.

Die tweede groep bestaan uit mense op die kantlyn. Hulle het geen mag nie. Hulle word maklik misgekyk. Hulle het geen status nie. Juis hierdie mense is sy nuwe gemeenskap wat Hom erken.

Jesus se koninkrykwaardes is nie debatspunte nie. Dit is ’n saak van lewe en dood. Daar is geen plek vir neutraliteit nie. Hierdie verhaal ruk ons wakker.

Terwyl Jesus na Jerusalem stap, is Hy honger. Hy sien ’n vyeboom vol blare. Dit lyk gesond, maar toe Hy nader kom, is daar geen vrug nie. In Matteus is vrugte tekens van getrouheid en gehoorsaamheid. 

Jesus se oordeel oor die boom is nie woede nie. Die vyeboom is ’n spieël vir ons. God is nie beïndruk met voorgee nie. Godsdiens is leweloos en vrugteloos. Godsdiens het geen toekoms nie. Om Jesus te volg bevry ons van dooie godsdiens. Dit lei ons na ’n lewe vol liefde, waarheid en integriteit.

 

Here, vul my met u Heilige Gees sodat ek vrugte sal dra. Amen.