Bybelse wysheid

DR. ANNES NEL

Matteus 21:12-13: “Die tafels van die geldwisselaars en die stoele van die duiweverkopers het Hy omgegooi en vir hulle gesê: ‘Daar staan geskrywe: My huis sal ’n huis van gebed wees.’”

Jare gelede het ek op ’n boek afgekom met die titel “Fundamentele en nie-fundamentele geloofsartikels”. Wat maak regtig saak in ons geloof, en wat nie? Die vraag is goed. Die antwoord kan gevaarlik wees. Dikwels maak ons dit wat sekondêr is, die belangrikste. 

Ons rangskik wat ons glo volgens ons eie voorkeure. Omdat ons seker is dat ons reg is, verdedig ons ons sienings as die finale waarheid en sluit ons ander stilweg uit wat anders dink.

Hierdie spanning tussen dit wat wesenlik is en dit wat nie is nie, lê in die hart van Matteus se Evangelie. Matteus plaas ons in Jerusalem net ná Jesus se triomfantlike intog en nooi ons om die vraag te beantwoord: “Wie is Jesus?”

Jesus is nie net ’n leermeester of profeet nie. Hy is die Seun van Dawid, die beloofde Messias, die ware Koning wat sy stad binnegaan. Wat Hy daarna doen, is skokkend. Jesus gaan reguit na die tempel, die middelpunt van Israel se godsdienstige lewe. Daar onthul Hy valse godsdiens.

Karl Barth het gesê dat godsdiens ongeloof is. Ons kan godsdienstige dinge doen en tog die lewende God mis. Rituele en kerk toe gaan, kan nie ware toewyding aan Jesus vervang nie. Hy is die belangrikste. Hy verdien ons volle oorgawe. Jesus roep ons terug na die wese van alles: Na Homself toe.

Here, bring my terug na U toe. Amen.