Briewe uit die binneland – Só issie lewe vir een-pond-sewe

Liewe GenootOktober is klaar. Die mooiste mooiste maand, maar soms ook ’n wilde ding wat spanning in die siel en wind in die bo-sfeer meebring. Ek is besig om ’n Nederlandse studiegids af te rond. Ek het dikwels gewonder of ek nie ’n bylaag met die opskrif “Idiomatich Nederlands” moet toevoeg nie. Nee, ek deel liewer hier ’n paar Nederlandse gesegdes met my landgenote, en dan raak ek dié lastige gevoel kwyt. Het jy ook al in ’n minder sukselvolle vergadering gesit en gedink jy mors jou tyd? Daar word koffie bedien, ’n uur later moet almal gaan piepie, en as alles verby is, dink jy: “Zij dronken een glas, ze deden een plas, en alles bleven zoals het was.” En as daar boonop iemand is wat aanhoudend praat, dan “hangt zijn tong aan een slinger”, en ek sien voor my geestesoog die pendulum heen-en-weer swaai en kosbare sekondes aftik. As daar boonop twee senior beamptes is wat albei hulle stemme met gesag wil dik maak, word gesê: “Twee hanen in één hok geeft veel gekakel en weinig eieren.” Want dis belangrik dat “wie kakelt, ook eieren moet leggen”. Dié beamptes moet eerder daaraan dink dat mens “niet harder moet blaffen dan de hond groot is”.Dink jy soms dat jou werkplek onnodig geld aan eksterne kundiges wil bestee terwyl julle reeds intern oor die vaardighede beskik? Dan vra die Nederlanders: “Waarom ergens anders melk halen als je thuis een koe hebt?” Dit maak almal net vies en “jaag de kat in de gordijnen”. Ek sien dit so voor my. . . Ja, wanneer kompetisie ter sprake kom, neem figuurlike taal oor om verontwaardiging en wraakgedagtes uit te sê, soos “wij zullen je eens een poepie laten ruiken”. Soos in Afrikaans, het die lyflike en dierlike ’n plek in Nederlands. Hulle “vallen ook met hun gatten in de boter, laten de aap uit de mouw, en knijpen de katjes in de donker”. Maar toe ek afkom op “als een olifant door de porseleinkast gaat”, weet ek hulle is ons een vóór. Ek kon werklik nie aan ’n Afrikaanse ekwivalent hiervoor dink nie. Ons gebruik graag die Engelse “bull in a China shop”. Laat hoor tog van jou as jy van iets weet. Vir die ouderdom moet jy respek hê, en “je moet een oude aap geen smoelen leren trekken”. En onthou, “een oude vogel is niet makkelijk te vangen” en “een oude rat vindt snel een gat”. En die Nederlandse ouma dink by haarself: “Mijn kinderen lachen omdat ze denken dat ik gek ben; ik lach omdat ze niet weten dat het erfelijk is!” Geduld met die ouderdom is verder nodig, en jy moet weet dat “oude katten ook melk lusten”.Die man-vrou-ding is ’n verhaal op sy eie. En Genoot, nou moet jy met hierdie vroueprater geduld hê. Hoewel ek regverdig sal probeer wees. Hmmn. Ek begin met die negatiefste teen my geslag, maar manne, daarna moet julle julle se sitplekgordels sty-y-y- f vasmaak: “Vrouwen zijn net als bussen; als je er een mist, neemt je gewoon de volgende.”“Vrouwen zijn om van te houden, niet om te begrijpen.” Maar nou die wending: “God schiep eerst de man, maar toen kreeg Hij een beter idee.”“De man is het hoofd van het gezin, maar de vrouw is de nek die bepaalt hoe het hoofd draait.”“Vrouwen houden van simpele dingen in het leven, zoals mannen.”Klaar baklei. En liewe manne, eintlik is ons bitter erg oor julle. . .Solank dit wat ingaan, tog net iewers weer kan uit. ’n Joernalis skryf dat sy die vorige dag heerlike sop vir haar kleintjies gemaak het, spesiaal met die alfabetpasta. Haar jongste het te veel geëet, en die volgende dag het ’n uitgebreide persberig die lig op die toilet gesien. Genoot, neem die lewe nie te ernstig op nie, en belas jou lyf nooit met te veel nie, want as jy jou koffie die oggend met Red Bull i.p.v. water maak, kom jy straks agter dat jou kar nog in die garage staan as jy al op die snelweg trek. – beukemuir@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Briewe uit die binneland – Só issie lewe vir een-pond-sewe

Kommentaar

Republikein 2026-11-03

Meld asseblief aan om kommentaar te lewer

Briewe uit die binneland – Só issie lewe vir een-pond-sewe

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.