Briewe uit die binneland – Die kern van ons lywe – aldus Josef Pilates (deel 1)

Liewe GenootAs kind het ek verstaan uitblinkers word in twee groepe verdeel: dié wat op die sportveld uitblink, en dié wat in die klaskamer haar ding doen en vreesloos haar rapport aan die einde van ’n kwartaal huis toe neem om geteken te word. Vandag besef ek gelukkig daar is meer. Tog wil ek nou fokus op ons lywe. Of ons liggame. “Lyf” klink so . . . beestelik, of GE-vat (of be-VAT). En minder na ’n woning vir die gees. Lyf klink honger en lus. Of moeg. Of so het ek gedink.So ’n paar maande terug begin ek met Pilates op aansporing van ’n vriendin wat my welsyn op die hart dra. Onder die deurdagte en streng leiding van Arlene begin ek saam met ’n stuk of ag vroue so om en by my eie ouderdom (maar baie meer bedrewe as ek) twee keer per week oefen. Genoot, en na week 1 was my lae rug minder seer en ek voel fisies goed. Ek doen navorsing en kom af op ’n artikel van Penelope Latey, Senior Lektor aan die Universiteit van Tegnologie in Sydney, Australië, waar sy ook die koördineerder was vir die Graad-sertifikaat, Metodiek van Pilates. Josef Hubertus Pilates (1880-1967), gebore in Duitsland, was ’n sieklike kind wat dikwels asma-aanvalle en rumatiekkoors gekry het, en daar is gevrees dat hy moontlik Tuberkulos onder lede het. Antibiotika was nog nie beskikbaar nie, en verder het die Industriële Revolusie en toenemende bevolkingsdigtheid in Europa tot gevolg gehad dat die gesondheidstoestand van die bevolking agteruitgegaan het. Onder die invloed van ene Friedrich Jahn, rig Duitse opvoedkundiges hulle toenemend op gimnastiek, gegrond op dié van die antieke Grieke. En net voor die draai van die eeu, in 1896 kry gimnastiek boonop sy regmatige plek as sportdissipline terug op die agenda van die Olimpiese Spele. Genoot, en onder hierdie omstandighede het klein Josef begeesterd begin oefen. As tiener was hy gesonder, en o.a. ’n geesdriftige skiër, duiker en gimnas. Op 32-jarige ouderdom verhuis hy na Engeland waar hy sy geld verdien deur te boks, as sirkuskunstenaar op te tree, en as ’n instrukteur in selfverdediging te werk. Toe die Eerste Wêreldoorlog in 1914 uitbreek, word hy gevange geneem. In die kamp moedig hy sy mede-broeders-in-verdrukking aan om saam met hom te werk aan ’n program om die liggaam op te bou. Toe die griep-epidemie in 1918 uitbreek, het die kamp waar Pilates opgeneem is, niemand aan dié siekte verloor nie. En soos ek verstaan, het die Groot Griep die lewens van duisende méér mense geëis as wat tydens die Eerste Wêreldoorlog gesneuwel het.Latey, het in haar navorsing uiteraard ook op ander bronne gesteun. Volgens Linda Sparrowe, die skrywer van Yoga Journal, USA (1994), is Pilates aan die einde van die oorlog oorgeplaas na die Eiland Man waar hy sy kennis ingespan het om gewondes te rehabiliteer. Hy begin eksperimenteer met die vere van matrasse wat aan die pasiënte se bedreëlings vasgemaak word. D.m.v. die ekstra weerstand van die vere help hy die pasiënte om hul spierbeheer en -tonus vinniger te herwin. Ná die oorlog keer hy terug na sy geboorteland, en in Hamburg verfyn hy sy metodiek. Hy ontdek die wonder van dans. En Genoot, toe ek dit lees, raak ek bewoë. Ek hou van dans. As kind wou ek so graag ballet gedoen het. Maar my ouers het nie gedink dat hul jongste meisiekind haar daarmee moes besig hou nie. Ek mag op die atletiekbaan gehol het, en geswem het toe die dorp uiteindelik ’n swembad kry. Maar ballet? Nee. Gelukkig het Pilates hierdie heerlikheid nie misgeloop nie. En boonop was hy ’n seunskind! Genoot, volgende week rond ek hierdie lyf-storie af. In die tussentyd: trek jou naeltjie terug tot net onder jou bors(te), ontspan jou skouers, trek jou ken in. Maar die belangrikste: Word so lank in jou gees en lyf dat jy moet buk as jy onder die Eiffeltoring deurloop. (Dankie prof. Aldo Behrens vir hierdie vergelyking. Ek sal dit nooit vergeet nie.)– beukemuir@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Briewe uit die binneland – Die kern van ons lywe – aldus Josef Pilates (deel 1)

Kommentaar

Republikein 2026-10-13

Meld asseblief aan om kommentaar te lewer

Briewe uit die binneland – Die kern van ons lywe – aldus Josef Pilates (deel 1)

Kommentaar

Republikein 2026-10-13

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.