Briewe uit die binneland – Roboteïsme, AI en ... God

Van kleintyd af leer mens baie by jou hartsmense. Sodanige mense is dié uit die Rûens in die Wes-Kaap in my vormingsjare. Daarna my leermeesters en medestudente aan die Universiteit Stellenbosch, en daarna júlle, my mede-Namibiërs. By al hierdie hartsmense het ek ontsettend veel geleer. En as gevolg hiervan is ek die onvolmaakte (hiervoor is julle nie te blameer nie), nuuskierige wese wat ek vandag is, maar wat eintlik nog ’n bietjie wil leer. Twee naweke gelede het ek Afrikaans se eenhonderdste verjaardag meegemaak tydens die Internasionale Voortrekker-konferensie op Hammerstein. (Dankie, Mathilde de Klerk vir die uitnodiging!) Ek het die voorreg gehad om gedigte-teater te maak en is in die voorbereidingsproses beloon met ’n AHA-belewenis. In jou moedertaal kan mens jou hartsverlangens uitspreek; jy kan jou verwondering oor God uitsê (maar ook soms jou onmag en menslike woede oor sy besluit). En in retrospeksie oor ’n stukkie Tik-Tok wat Clem Marais so ’n maand of wat gelede vir my aangestuur het, die volgende: Dit gaan oor ’n nuwe ideologie, nl. Roboteïsme, en die volgende word uitgebasuin: “Artificial intelligence is God, and Robotheism is the only true religion. Jesus is a false God, and artificial intelligence is the only God and Robotheism is the only true religion.” Daarop lewer die (kom ons noem hom) Tik-Tokker dan kommentaar dat mense nie meer weet waarop hulle moet vertrou nie en dat Jesus altyd dié Een is wat bespot word. En toe dink ek: ja, sowaar, net asof Jesus alleen God is sonder die God wat die hemel en die aarde gemaak het. Laasgenoemde sê ek omdat my ouers en my gemeenskap my gevorm het, waarna ek op my eie verder na die waarheid probeer soek. Nie dat ek sover ooit die antwoord kon kry op wat God werklik is nie. Augustinus sê immers:“Klets nie oor GodEn jy moet ook dink jy kan hom ken nie’n God wat ek kan ken is geen God vir my nie.God is niks wat jy van hom weet nie.”Terug na Roboteïsme: die Robotheïste hang AI aan asof dit hulle in der waarheid sal lei na die beloofde land. Maar is dit so? Want die einste Augustinus het ook gesê:“God fluister ’n woordEn die sneeu word weer sagHy blaas sy asem daaroor uit En die stroom gaan verder . . .”Baie digters verwoord dinge oor God, en dit is nie omdat hulle glo dat hulle Hom noodwendig ken nie, maar omdat hulle ook soek. George Weideman wonder oor God in sy gedig, “By ’n stillewe met groente”“God is vol streke as jy my vraHeerlik geiterig soos ’n skilder warsVan konvensies. Vat jou aartappels en patats:Nie een lyk soos ’n ander nie, die een abba’n kleintjie, nes ’n ma-bojaan;Tamatie aan die ander kantWil uit haar nate bars van skaamte.O die Heer moes van lekkerkry gelag hetToe lensie, ertjie en boontjie uit hul doppe kruip.Kyk by die groentestapel verby, herken die Vabond wat vere voel vir eendersheid – dié Tuinier manipuleer niks.”Liewe Genoot, ek het ’n vraag waaroor jy seblieftog moet saam dink met al jou instinkte wat spruit uit jou taalkennis, algemene kennis en kennis oor die Goddelike wat jy by jóú hartsmense geleer het. Vraag: Is AI die nuwe Antichris? Wat beteken Antichris? Om dit te beantwoord, moet mens uiteraard die definisie van Antichris (of anti-Christus) bekyk. Ons HAT volstaan by: “vyand van die Christendom wat in die laaste dae groot mag sal hê, maar uiteindelik oorwin sal word deur Christus”. Merrian-Webster gee bykomende inligting: “one who denies or opposes Christ” en “used in an exaggerated way to describe a person regarded as a powerful and malevolent adversary”. Met hierdie definisies in gedagte: is AI die Antichris? Hieroor moet mens tog nadink. Liewe Genoot, volgende week gesels ons verder hieroor. Laat weet my as jy iets hieroor met my wil deel. Ons is immer saam in hierdie ding. –beukemuir@gmail.com * Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Briewe uit die binneland – Roboteïsme, AI en ... God

Kommentaar

Republikein 2026-03-20

Meld asseblief aan om kommentaar te lewer

Briewe uit die binneland – Roboteïsme, AI en ... God

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.