Breëbors hamelstert

Van breëbors tot hamelstert. Dis nou ons bure se topmansrugbyspan in Groen en Goud, wat die afgelope Saterdag op Ellispark in Johannesburg terstond soos ’n flouerige kersvlam met 35-23 gesnuit was.

Nadat die Bokke die All Blacks die vorige Saterdag in die Laeveld, Mpumalanga, by die Mbombela-stadion vir die eerste keer sedert 2014 in ’n tuistoets met 26-10 afgeransel het, is die heuningkwaste wyd en syd deur al wat ’n rugbykenner en sportskrywer is uitgehaal.

Die Springbokke is van heinde en verre besing en ’n cum laude-graad vir Kiwi-slag is aan hulle toegeken.

Dit was die Kiwi’s se derde loesing op ’n streep nadat Ierland hulle Juliemaand in Nieu-Seeland met ’n reekssege ore aangesit het. En arme Ian Foster, die All Blacks se hoofafrigter, kon sekerlik al voel hoe die vlymskerp lem van die guillotine hom van sy pos onthef.

Daar is geskryf Rassie Erasmus en Jacques Nienaber se planne kan nie gekritiseer word nie.

Maar nou is die Bokke se tjank afgetrap, seg elkeen wat sy eie rugbykennis en mening hoog ag. En die lang messe is uitgehaal vir Nienaber en sy afrigtingspan oor swak spankeuses en die wedstrydplan wat nie na behore uitgevoer is nie.

Ná die Laeveldtoets het die Kiwi-jagters gemiddeld agt-uit-tien beoordelings gekry, maar ná die fiasko op Ellispark is hulle tot 5.22 uit tien afgemerk.

In Mbombela het Tarzan Marx en ander monsters op die veld verrys. Die All Blacks het glo soos ’n onbeholpe planlose skoolspannetjie gelyk. Maar Saterdag was dit die Bokke wat nie hul antwoorde gereed gehad het nie.

Die gewraakte kelnerin, Suzie, wat na bewering tydens die 1995 Wêreldbeker in die Kiwi-kamp net voor die eindstryd op Ellispark doenig was, se doepa het glo ook laasweek by die Bokke ’n draai gegooi. Ses van die Bokke se ysters en selfs Erasmus was glo op drup om die nodige chillisous terug in die are te kry.

Woeps, is al die euforie by die venster uit. Mostert na die maal, kan mens sê.

Al is die Bokke nou druipstert, vertrek hulle môre na Australië om die Wallabies daar in twee toetse van die Rugbykampioenskap te pak. Die Bokgeskiedenis teen die Wallabies vir die afgelope tien jaar lees soos een van Stephen King se beste rillers.

Sedert 2013 het die Bokke ses keer Doer Onder verloor en een gelykopuitslag afgedwing. Dit sê vir my die Wallabies kan nie onderskat word nie. Die Bokke is in laasjaar se Rugbykampioenskap twee keer deur Australië uitoorlê.

Die Kiwi’s was Saterdag onderskat en nou spog die Nieu-Seelanders heel wintie met 22 springbokkopvelle aan die kapstok in die voorhuis. (Plus dié van Nienaber, Erasmus, Deon Davids en Mzwandile Stick).

Al het die Poemas Saterdag die Aussies met sewe vyfpunters en ’n allemintige rekordtelling van 48-17 in San Juan verskeur, is die Aussies met Dave Rennie as afrigter uitgeslape genoeg om hul beste voetjies op tuisbodem voor te sit. Die “onervare” Wallabies het wel die eerste toets teen Argentinië met 41-26 gewen.

Bongi Mbonambi, Faf de Klerk en Jesse Kriel is beseer, terwyl Kurt-Lee Arendse vir ’n gevaarlike lak vir vier wedstryde geskors is. Genadiglik is Duane Vermeulen weer pure perd.

Die Bokke bly ongetwyfeld ’n kwaliteitspan, maar as jou voete nie op die grond is nie, kan jy nie rugby speel nie.

Ná die toets op 27 Augustus in Adelaide draf die Bokke weer op 3 September in Sydney teen die Wallabies op die veld. Hup, Bokke, hup!