As ons verandering wil hê, moet ons self begin!

Ons praat almal oor verandering. 

Ons kla oor wat verkeerd in ons gemeenskappe, ons land en selfs in die wêreld is. Ons wys maklik ’n vinger en vra hoekom iemand anders nie iets doen nie. Maar wanneer laas het ek myself afgevra: Wat doen ék om ’n verskil te maak?

Dit is maklik om te sê dat dinge moet verander. Dit is maklik om op sosiale media te skryf oor wat verkeerd is, oor politiek te kla, die regering te blameer of te sê dat mense nie meer omgee nie.

Maar verandering begin nie altyd in groot kantore of by mense met mag en invloed nie. Soms begin dit by my en by jou. By die klein keuses wat ons elke dag maak.

Ek glo ons wag dikwels vir iemand anders om die eerste stap te neem. Ons wag vir die buurman om die straat skoon te maak. Ons wag vir die regering om elke probleem op te los.

Ons wag vir iemand anders om ’n jongmens te help, ’n bejaarde by te staan of iemand in nood te ondersteun. En intussen hou ons aan met kla.

As ek ’n probleem in my gemeenskap sien, kan ek dalk begin deur iets daaraan te doen. Ek hoef nie ’n miljoenêr te wees om iemand te help nie.

Ek hoef nie ’n belangrike posisie te beklee om ’n verskil te maak nie. Soms is ’n eenvoudige daad van vriendelikheid genoeg om iemand se dag te verander.

Ek kan begin deur my eie omgewing skoon te hou. Ek kan ’n kind aanmoedig om te leer. Ek kan iemand wat swaarkry, met respek behandel. Ek kan ophou om gerugte te versprei. Ek kan verantwoordelikheid vir my eie dade neem.

Want hoe kan ek beter dinge van ander verwag as ek self nie bereid is om beter te doen nie? Ek dink ook ons moet ophou om vir die perfekte tyd te wag. Daar sal altyd ’n rede wees om niks te doen nie.

Ek het nie genoeg geld nie. Ek het nie genoeg tyd nie. Iemand anders sal dit doen. Ek is net een persoon. Maar miskien is dit juis waar ons denke verkeerd is.

Een persoon kan dalk nie die hele wêreld verander nie, maar een persoon kan iemand anders se wêreld verander. Ek het al gesien hoe klein dingetjies ’n groot impak kan maak. ’n Glimlag. ’n Bemoedigende woord. ’n Bietjie tyd. ’n Helpende hand. Om iemand se naam te onthou. Ons onderskat soms die krag van eenvoudige dinge omdat ons dink verandering moet altyd groot en indrukwekkend wees. Maar verandering begin dikwels stilweg. Dit begin wanneer ek besluit om anders as voorheen op te tree.

Dit begin wanneer ek verantwoordelikheid neem sonder om altyd iemand anders te blameer. Dit begin wanneer ek besef dat ek deel is van die gemeenskap waaroor ek so maklik kla. Ons kan nie aanhou om verandering te eis terwyl ons self dieselfde bly nie.

As ek ’n beter land wil hê, moet ek begin by die manier waarop ek my medemens behandel. As ek ’n veiliger gemeenskap wil hê, moet ek bereid wees om te gee.

As ek wil hê jongmense moet hoop hê, moet ek bereid wees om hulle te ondersteun. As ek wil hê mense moet vriendeliker wees, moet ek self vriendelikheid wys. Ek kan nie alles verander nie. Jy ook nie. Maar ek en jy kan iets verander.

En miskien is dit waar ons moet begin. Nie môre nie. Nie wanneer iemand anders die eerste stap neem nie. Nie wanneer alles perfek is nie. Vandag! Ek sê maar net; as ons werklik verandering wil hê, moet ons ophou wag vir iemand anders om daarmee te begin. 

Die verandering waarna ons almal soek, kan dalk begin met die persoon wat ons elke oggend in die spieël sien.

[email protected]