AI en om oor dinge te dink

Dit voel vir my wanneer ’n mens regtig met goeie, waardevolle dinge besig is, jy die meeste teëspoed ontvang. Dis juis dan dat ’n mens dit waarmee jy besig is met oorgawe moet benader.Dis te lekker om party oggende na my seuntjie te luister terwyl hy babbel. Hy vertel stories van dit wat in sy kop aangaan. Soms opgemaakte verbeeldingstories en ander kere dinge wat werklik gebeur het. Hy is ook soms besig om te oefen om “logiese” gevolgtrekkings te maak en kom dan soms tot lagwekkende slotsomme. Dan help ons hom net ’n bietjie terug op die regte spoor. Maar die dinge waaroor ons kind in hierdie stadium wonder en gevolgtrekkings maak is regtig iets om te beleef. Hy het my al menigte male baie moeilike vrae gevra terwyl ons in die verkeer rondry en ek eintlik op my bestuursvernuf moet fokus. Soms is dit moeilike lewensvrae en ander kere weer is dit diep vrae oor hoe die dinge van die lewe werk – waarvoor ek dikwels nie eens die antwoorde vir hom het nie. Ek doen my bes om die man met sy gedagtes te help, maar soms dink hy aan dinge waarvoor selfs sy ma nie die antwoorde het nie. En dit laat my hoop dat hy wel eendag self goeie antwoorde mag kry, uit sy eie uit, vir al die wonderlike gedagtes en dinge waaroor hy wonder. Ek wens soms ek kon hom meer help in sy “wonderinge”. Wat vir my die lekkerste is, is om ’n toeskouer te wees terwyl hy besig is om oor die wêreld rondom hom te dink.Ek het ’n tydjie terug ’n gesprek (vir my skrikwekkend) met iemand gehad. Die persoon was jonger as ek en besig om vir my te vertel hoe wonderlik artificial intelligence (AI) dan nou is. Die persoon het met groot trots vertel dat hy nie meer tyd mors om te dink oor hoe om sy e-posse te beantwoord nie, want hy gebruik AI om hom met antwoorde te help. Hoe sê hulle so lekker in Engels? He lost me at “mors nie meer tyd om te dink nie”. Toe ek vanoggend my Word-dokument oopmaak, het die program my ’n rukkie lank nie toegelaat om enigiets te begin tik nie, omdat ek die opsie gegee is om via ’n “shortcut” van Co-pilot gebruik te maak. En die program wou duidelik hê dat ek daardie opsie moes kies. Al wat ek van Co-pilot af weet is dat dit deur Microsoft Word aangebied word nie, maar ek twyfel of Co-pilot vir my van enige waarde gaan wees as ek van plan is om in Afrikaans te tik. Het ek al gesê hoe lief ek vir ons taal is? Voorwaar ’n skuiling en ’n vesting wanneer die robotrewolusie ons kom oorneem. (Net ’n grappie, als net grappies).Ek is bekommerd oor die toekoms van die mensdom as denke ’n las word in plaas van ’n vrywillige aksie. Dit is wonderlik om ’n brein te hê wat kan dink. Daarin is ons steeds myle voor AI.Maar AI is besig om te leer om te dink (op ’n rekenaarmanier) en ons mense wat vir AI allerhande vrae vra en gesprekke voer, ontwikkel tans daardie “brein”. In plaas daarvan om vir mekaar vrae te vra, vra ons nou sagteware.Google lei ons al jare daarmee op, maar dit het ons ook laat ophou om met mekaar te praat. AI is ’n ontwikkelende massa inligting wat vir my ’n bietjie angswekkend is.En daar gee ek my ouderdom weg – oud genoeg om van die Terminator-flieks te weet... Net in die weergawe van die storie in my kop, ontmoet elkeen van ons eendag die massa data wat ons in AI ingepomp het en die figuur wat ons daar leer ken, is ’n sagtewarekloon van onsself, net sonder ’n hartklop en ’n bietjie meer tegnologies aangepas as ons menslike self.Ek weet regtig nie genoeg oor hierdie onderwerp om myself daaroor uit te spreek nie. Maar ek was nog altyd goed daarin om belaglikhede raak te sien. As dit ’n goeie ding begin raak om op te hou dink oor sekere dinge, dan is ek redelik seker ons mensdom is met nonsens besig. Want dit kan net iemand anders begin bevoordeel as ek en jy begin ophou dink. En dit dan boonop as ’n goeie idee beskou! Sterkte julle, die toekoms is uitdagend! Kom ons maak die beste van die saak.– Gasskrywer– lane.lwenhold@gmail.com>* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

AI en om oor dinge te dink

Kommentaar

Republikein 2025-11-04

Meld asseblief aan om kommentaar te lewer

AI en om oor dinge te dink

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.