20 jaar gelede

MAANDAG 25 JULIE 2005

– Die bitter pil wat die Adjunkminister van Werke, Vervoer en Kommunikasie, mnr. Paulus Iilonga Kapia, Vrydag moes sluk toe hy sy kantoor verlaat het, is deur die Minister van Presidensiële Aangeleenthede, dr. Albert Kawana, meer draagbaar gemaak met ’n verduideliking dat sy kollega uit eie versoek deur President Hifikepunye Pohamba toegelaat is om met verlof te gaan.

– ’n Ontstoke krediteur van Where Others Wavered het Vrydag op die punt gestaan om die bestuur van dié N$65 miljoen-staatsgefinansierde rolprent oor die bevrydingstryd hof toe te sleep.

– ’n Baba van vyf maande is in ’n motorongeluk dood wat glo deur ’n bestuurder sonder ’n lisensie veroorsaak is.



DINSDAG 26 JULIE 2005

– Spelers in die Avid-bankrotskapsage kon gister met sekerheid verantwoording doen van minder as 20 persent van die N$30 miljoen in openbare fondse wat die Maatskaplike Voorsorgkommissie aan dié sakefront van voorheen benadeeldes toevertrou het.

– Drie personeellede in die eksamenafdeling by die Universiteit van Namibië (Unam) is geskors hangende ’n ondersoek na uitslagbedrog.

– Die bestuur van die Nasionale Behuisingsonderneming (NHE) moet die persepsie regstel wat onder sy werknemers heers dat die maatskappy net geïnteresseerd is in selfverryking.



WOENSDAG 27 JULIE 2005

– ’n Getuie wat Maandag in die Avid-likwidasiedrama onder eed gesweer het dat hy nie ’n “blou duit” van die Maatskaplike Voorsorgkommissie se N$30 miljoen-belegging ontvang het nie, is gister deur die polisie se handelstak buite die hof se deure ingewag.

– Die staatskas het ’n onverwagte meevaller gekry toe Namdeb N$350 miljoen aan belasting betaal het.

– Die Namibiese Grondwet vereis nie ’n onafhanklike landdroskommissie nie.



DONDERDAG 28 JULIE 2005

– Die derde dag in die Avid-bankrotskapsage het gister vir twee nuwe opskuddings gesorg.

– ’n Doodse stilte het oor Namibia Wildlife Resorts gesak sedert dié beleërde staatskorporasie sy reddingspoging aangekondig het.

– ’n Oostenryker het hom lelik teen die gereg vasgeloop toe hy weens die onwettige besit van 30 gram dagga ’n vonnis van N$1 000 opgelê is.



VRYDAG 29 JULIE 2005

– Die omstrede Swapo-politikus wat gister vir ’n tweede dag in die bank was in die likwidasiestryd tussen die Maatskaplike Voorsorgkommissie en Avid Investment Corporation het so hittete agter die tralies gedraai.

– Wanneer Hendrik Hamman Saterdag die berugte Chikurubi-tronk by Harare saam met sy medevlieënier Neil Steyl verlaat, is sy vryheid van korte duur.

– Die versuim van die Namibiese Uitsaaikorporasie (NBC) om ’n 9% verhoging aan werkers toe te staan, gaan nou in die Arbeidshof uitgespook word.