20 jaar gelede

MAANDAG 25 APRIL 2005

– ’n Ekologiese ramp wat die ganse benede-Swakop in ’n lewelose woestyn kan omskep, word voorspel sou rekening nie gehou word met slik van die Langer Heinrich-uraanmyn nie.

– Die vermeende kontrakmoordenaar Shorty Erasmus (28) het Vrydag die kort tydjie wat hy in die hofsaaltjie op Kalkrand saam met sy ouers se voormalige werknemer Sylvester Beukes (22) en dié se ouer broer, Gavin (24), in dieselfde beskuldigde bank gestaan het, nie een keer in hulle rigting gekyk of met hulle gepraat nie.



DINSDAG 26 APRIL 2005

– Die eerste toetssaak in jare tussen die Monumenteraad en ’n private ontwikkelaar kan spruit uit die herbouing van die Karibib Bäckerei.

– Die permanente sekretaris in die Ministerie van Gesondheid en Maatskaplike Dienste, dr. Kalumbi Shangula, sê die vyf senior amptenare van die Windhoek Sentrale Hospitaal wat hangende ’n grootskaalse bedrogondersoek gevra is om hulle kantore te ontruim, is nie geskors nie.

– Namibië se totale onderwysstelsel is gister in chaos gedompel nadat die sluiting van skole vir honderde duisend skoliere met drie dae uitgestel is.

– Vrese dat hy soos ’n Oostenryker tandeloos gelaat gaan word, het ’n toeris uit Duitsland vroeg gisteroggend op Swakopmund doodstil laat sit terwyl hy deur drie gemaskerde mans beroof is.



WOENSDAG 27 APRIL 2005

– Die Verkiesingskommissie van Namibië is verantwoordelik vir die tekortkominge van die direktoraat van verkiesings, mnr. Philemon Kanime en sy amptenare, aangesien die Kommissie nie daarin kon slaag om die hof te oortuig dat die uitslag van die verkiesing dieselfde sou wees indien daar aan alle regulasies van die Kieswet voldoen is nie.

– Pleidooie dat dit die “Here se geld” is, het gisteroggend op dowe ore geval toe drie rowers die koster van die NG-gemeente Swakopmund oorval en met ’n geskatte buit van tussen N$60 000 en N$70 000 weggekom het.



DONDERDAG 28 APRIL 2005

– Die rykmansbroers, mnre. Gert en Christo Joubert, eienaars van die Erindi-gasteplaas naby Omaruru, het gister planne van N$10 miljard vir die ontwikkeling van dié gesogte uitspanplek bekend gemaak.

– Die arbeidskommissaris het bevestig dat ’n dispuut verklaar is tussen die Namibiese Unie vir Voedsel- en Verwante Werkers (Nafau) en die bestuur van Ramatex se filiaal Rhino Garments oor die skeidingspakkette van 1 500 werkers wat onlangs deur dié Maleisiese reus afgedank is.



VRYDAG 29 APRIL 2005

– Duinefietsryers gaan die naweek langs die sentrale kusgebied geteiken word as nasleep tot ’n veldtog wat sedert die Paasnaweek en die koms van Bike SA ontstaan het.

– Ingrypende belastinghervormings kan dalk binnekort die lig sien ten einde die Regering in staat te stel om teen ’n netto koste van sowat N$1,2 miljard per jaar aan elke Namibiër ’n basiese leeftoelaag te betaal.