20 jaar gelede

MAANDAG 20 MAART 2006

– Reën in die Hardapdam se opvanggebied het personeel van NamWater Vrydagaand wéér die sluise laat ooptrek om die vlak konstant te hou.                                                           

– Namibië se graanprodusente verwag ondanks die bogemiddelde goeie reën nie rekordoeste nie.    

– Omvattende hervormings soos uitgestip in Namibië se nuwe Verbeteringsprogram vir die Onderwys- en Opleidingsektore (Etsip) is volgens die bekende ontleder dr. Joe Diescho ondanks die positiewe idees in dié vyftienjaarplan nie die onmiddellike antwoord op die vertrouenskrisis in opvoeding nie.

DINSDAG 21 MAART 2006

– Onafhanklikheidsdag    

WOENSDAG 22 MAART 2006

– Nasiebou en die uitroei van korrupsie was gister hoog op die agenda van Pres. Hifikepunye Pohamba toe

hy as hoofspreker by Namibië se 16de onafhanklikheidsvieringe in Windhoek opgetree het.           

– Die hele sowat N$15 miljoen wat nog nodig is vir die voltooiing van die biografiese film oor oudpresident Sam Nujoma en die vryheidstryd, Where Others Wavered, gaan waarskynlik vanjaar uit belastingbetalers se sakke kom.    

– Die kabeljou loop! Of los die stokke en kom haal sommer marsbankers emmersgewys van die strand!               

DONDERDAG 23 MAART 2006

– Inwoners van Hochlandpark moes Dinsdagaand inderhaas emmers en moppe nadersleep om van stormwater ontslae te raak wat in hul huise geloop het.                                               

– Die vrou van oorlede mnr. Lazarus Kandara was gister vasbeslote dat die pistool waarmee haar man homself glo doodgeskiet het, nié een van die vuurwapens was wat hy tuis aangehou het nie.   

– ’n Onderwyseres van Keetmanshoop wat daarin geslaag het om die deure van ’n drinkplek te laat sluit omdat selfs laerskoolkinders snags daar uitgehang het, se huis en motor is uit weerwraak onder die klippe gesteek.

VRYDAG 24 MAART 2006

– Die sliksluis van die Swakoppoortdam is Woensdag omstreeks 18:30 oopgemaak om die vuil water onder in die dam uit te laat en te keer dat die nuwe vars water te veel oor die damwal stroom.             

– Lede van die Namibiese polisie het laat gistermiddag die eerste swaar vuur getrek vir beamptes se beweerde reëllose optrede tydens die dood van oorlede mnr. Lazarus Kandara.

– Die streng regrukmaatreëls wat die Ministerie van Finansies verlede jaar in plek gestel het om die staat se

siekefonds (Psemas) van ondergang te red, werp vrugte af.