’n Man wat kan spel

Daar is ’n paar woorde wat ek gedink het ek kon spel tot ek by Republikein begin werk het – wel twee om presies te wees. Dis nie baie ingewikkelde woorde nie. “Prokureur” en “ingenieur” het my sowat drie jaar gelede gewen en ek het aan myself gesê dis juis omdat dit sulke algemene woorde is dat ek my instink gevolg en hulle geskryf het soos dit “klink” sonder om te bevraagteken of ek dit reg skryf.Ek moet myself ook aan hierdie twee woorde herinner wanneer ek sagkens vir iemand moet sê hulle het ’n spelfout of ’n tikfout gemaak. Die probleem is daar is nie ’n mooi manier om iemand se foute uit te wys nie en juis daarom kan mense verdedigend raak wanneer jy vir hulle sê ingenieur word met ’n “i” geskryf en nie ’n “e” nie. In my ervaring is dit mans wat die ergste teëskop wanneer jy hul spelfoute uitwys, maar ek dink nie hulle besef hoe skaars ’n man is wat kan spel nie. Ek en ’n vriendin het jare gelede gesê ons soek mans wat kan spel en leestekens reg gebruik – en as hy van ’n ellips weet, begin ons al die troue beplan. Baie mense (veral mans) sal met my stry as ek sê dit is belangrik vir my dat ’n man kan spel. “Jy weet mos wat ek bedoel,” is die mees algemene verweer vir my vereiste. Ja, ek weet wat jy bedoel, maar ek wil ook nou jou matrieksertifikaat sien. . . ek wil net gou iets kyk vir interessantheid. En sommer ’n IK-toets ook. Die waarheid is baie mense (waarvan ek ’n voorbeeld is) kan jou nie heeltemal ernstig opneem as jy nie kan spel nie. En ja, ek het empatie met mense met disleksie. Elke liewe persoon wat ek ken met disleksie is uiters selfbewus omdat mense hulle nie so ernstig opneem nie, juis omdat hulle nie kan spel nie, maar iemand wat met die wêreld se selfvertroue verkeerd is, kan by my verbyhou. “Dit maak nie saak nie,” is die ander algemene verweer. Ja, natuurlik maak dit nie nou saak nie, maar wat as ons trou? Hoe vertrou ek in die eerste plek dat my nuwe van ooit reg gespel is as daar ’n goeie kans is dat jy dit jou lewe lank al verkeerd spel? Wat as ons kinders kry? Ek kan jou nie vertrou om die geboortesertifikaat te gaan uitskryf nie. En ek is in daardie geval die enigste ouer wat die kinders kan help leer vir speltoetse. Jy kan nie vir die eerste keer in jou lewe leer hoe om “warrelwind” te spel wanneer klein Sannie op ’n Donderdagaand kom sê sy het vergeet sy skryf môre ’n speltoets nie.Stel jou nou voor as klein Sannie matriek maak en sy kan “warrelwind” spel en jy kan nie. Kom ons begin nie by die begrafnisbriefie nie. As daar spelfoute in my begrafnisbriefie is, sal ek by jou spook. Jy sal nie ’n enkele nag se rus kry totdat jy “warrelwind” en “vuurmaakplek” kan spel nie. Jy sal snags wakker word met ’n koue rilling in jou nek en ’n sagte stemmetjie wat jou aanspoor met “w-a-r-r-e-l-w-i-n-d, w-a-r-r-e-l-w-i-n-d”. Stel jou nou voor as die laaste woorde waarvoor jy onthou moet word Jan of Piet se wankelrige poging tot woorde is. Nee, Jan of Piet, ek sal nie in vreugde rus nie en ek sal ook nie vir ewig in jul harte wees nie – ek spook vanaand by jou. Ek is vanaand in jou slaapkamer besig om te “w-a-r-r-e-l-w-i-n-d, w-a-r-r-e-l-w-i-n-d”.– irene-mari@nmh-hub.com.na

’n Man wat kan spel

Kommentaar

Republikein 2025-11-05

Meld asseblief aan om kommentaar te lewer

’n Man wat kan spel

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.