Roots College open sy deure in Februarie

Roots College op Stampriet maak sy deure vir die eerste keer op 26 Februarie oop. Volgens Eddie Conradie van Roots College kan voornemende studente nog tot 2 Februarie registreer. Hy sê die eenjaar-sertifikaatprogram sal studente met die eerste boublokke voorsien om ’n sterk basis te vestig om indiepte-kennis en praktiese landbou- en entrepreneursvaardighede te kry. Die program lê die grondslag vir studente om nasionale diplomas in plant- en dierkunde te verkry. Conradie is baie opgewonde oor die opening van Roots College, waar die passie vir onderrig en landbou saamgevoeg is vir dié baanbrekersprojek.“Met die kennis en vaardighede wat by Roots College geleer word, sal landbou-entoesiaste ’n positiewe impak op hul gemeenskappe kan maak deur vaardige werkers en suksesvolle entrepreneurs in die landbousektor te wees. Daar word voortdurend daarna gestreef om werksgeleenthede te skep en Namibiërs se lewensgehalte te verbeter,” het Conradie gesê.Die sertifikaatprogram behels twee komponente, naamlik teorie en prakties. Conradie sê die teorie-komponent van die studieprogram sal by die Curro-skool Windhoek Gimnasium aangebied word, terwyl die praktiese deel by Roots se plaas by Stampriet sal plaasvind. Die sertifikaatprogramme vir plant- en dierkunde voorsien die grondslag vir onderskeidelik volhoubare gewas- en veeboerdery oor ’n wye spektrum in beide produksie en bestuur. Die minimum vereiste vir voornemende studente by Roots College is graad 11. Ná die voltooiing van die sertifikaatprogram sal ’n student kwalifiseer om verder vir ’n landbou-diploma te studeer of om as ’n toesighouer op ’n plaas met gewas- of veeproduksie te werk. Volgens Conradie toon studente groot belangstelling en word hy oorval met navrae.“Die belangstelling is oorweldigend, ondanks ons bemarkingsveldtog wat eers op 27 Desember verlede jaar afgeskop het. Ons kyk reeds na 20 studente,” het Conradie gesê. Boonop bied Roots College 10%-afslag aan in gevalle waar die volle betaling van die program vandag (16 Januarie) ontvang word.Roots se visie is om ’n nuwe geslag landbou-entrepreneurs in Namibië op te lei en ’n nuwe era vir voedselproduksie, waardetoevoeging en selfvoorsiening te skep.Dié heel eerste landboudorp in die land is die breinkind van dr. Johan Rieckert en het in 2017 gestalte gekry.Die idee is dat ouers wat hulle kinders ná skool na die kollege stuur, in ’n klein boerdery-eenheid belê waar die student kan woon en boer terwyl hulle in landbou opgelei word.Conradie voeg by vele ander moontlike kursusse soos onder meer toerisme en gasvryheidstudies, finansiële bestuur en rekeningkunde, maritieme studies en akwakultuurboerdery word vir die toekoms beplan.“Wat egter baie belangrik vir ons is, is dat Roots College en die studierigtings deur die volle registrasies van die Namibiese Kwalifikasie-owerheid (NQA) gaan en ons volkome by hulle geregistreer word. Ons werk tans ongelooflik lekker saam met hulle,” het hy gesê. – francoise@nmh.com.na

Roots College open sy deure in Februarie

Kommentaar

Republikein 2026-05-05

Meld asseblief aan om kommentaar te lewer

Roots College open sy deure in Februarie

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.