Mutete kan landelike boere hupstoot gee

Tradisionele Roselle-hibiskusblomme word tans vanaf Otavi verkry om heilsame Mutete-hibiskussap te vervaardig, maar daar is groot planne vir boere in landelike gebiede in die Noorde.Mutete-sap, ’n Eg Namibiese produk, pryk reeds op winkelrakke en groot uitbreidings word vir die toekoms beplan. Mutete is die Rukwangali-woord vir die Roselle-hibiskusblomme, Hibiscus sabdariffa, waarvan die sap gemaak word. In Oshiwambo staan dit bekend as Omutete. Volgens een van die drie vennote van MYM Trading cc Namibia, Werner Alweendo, gaan landelike boere opgelei word om die tradisionele hibiskus volgens hul standaarde te verbou.“Mutete groei reeds organies by Otavi, naby Ondangwa waar ek vandaan kom en in die Kavango- en Zambezistreek,” het Alweendo aan Agri Monitor gesê. Saad word in September gesaai en die plant word gewoonlik in April geoes. Tradisioneel word die blare van die plant as wilde spinasie gekook. Van die kelke of blomme word sap, tee en konfyt gemaak. Volgens Alweendo is Mutete nie erg sensitief vir weerstoestande nie, behalwe in die winter is dit rypsensitief. “Deur middel van ’n skema gaan ons boere in landelike gebiede ’n hupstoot met opleiding gee om met die verbouing te begin om hibiskusblomme te lewer.”Alweendo neem waar as bemarkingshoof en is verantwoordelik vir die produkontwikkeling. Die ander twee vennote is die waarnemende uitvoerende hoof, Fredericks Shipipa, en José Kauhuna is in beheer van verkope. Die maatskappy se sapfabriek is in Prosperita in die hoofstad geleë en verskaf tans werk aan tien mense. “In drie maande behoort ons ’n totaal van 15 werknemers in diens te neem. Soos die besigheid stadig maar seker groei, sal die ideaal wees om 21 mense in diens te hê,” het Alweendo gesê.“Masjinerie sal na verwagting in Maart vanaf die Durban se hawe in Windhoek aankom om aan die aanvraag te voldoen.” Hy sê die sap verkoop flink in winkels en is reeds beskikbaar in takke van Food Lover’s Market, Spar, OK Foods en OK Express en restaurante in Windhoek, asook Spar Elisenheim en Okahandja en dit sal binnekort in nog winkels beskikbaar wees. “Ons het ons eie geheime resep vir die Mutete-sap en het veral groot belê in voedselwetenskap om die regte smaak te kry. Sommige ander hibiskusblomprodukte se smaak is te bitter,” het Alweendo verduidelik. Kennedy Halwoodi is hul voedselwetenskaplike en die Namibiese Instituut vir Standaarde het ook die produk goedgekeur. Alweendo sê Mutete hou verskillende gesondheidsvoordele in en word deur dokters aanbeveel, soos vir die regulering van bloedsuikervlakke, hulp met gewigsverlies en opgeblasenheid en die reiniging van die spysverteringstelsel. Volgens hom is die sap ryk aan vitamiene C en E en antioksidante en beveg dit inflammasie. – francoise@nmh.com.na

Mutete kan landelike boere hupstoot gee

Kommentaar

Republikein 2025-05-14

Meld asseblief aan om kommentaar te lewer

Mutete kan landelike boere hupstoot gee

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie