MBV hou groot makietie

Verlede week is groot makietie in die Suide gehou, toe die Maltahöhe Boerevereniging (MBV) sy 75ste bestaansjaar by At Kronenhof gevier het. Deur die loop van die dag het verskeie sprekers ’n spreekbeurt oor ’n spesifieke tema gehad, onder andere Christa Bergemann, Christian Otto en Ernst Erni wat bietjie gesels het oor die geskiedenis van dié boerevereniging. Landboukundige Mecki Schneider, die NLU-president, Piet Gouws, en die motiveringspreker Franco Feris het ook gesprekke gelei.Voorts het verskeie borge soos Old Mutal, Bank Windhoek, Feedmaster, MICCA Sales and Marketing, en Santam ook inligting met die gaste gedeel.Volgens die MBV se voorsitter, Tjaard Venter, was dit ’n insiggewende en goeie dag. “Ons het goeie sprekers gehad en almal het lekker saamgepraat en ons het goeie terugvoer van almal gekry.”Ten opsigte van die boerdery in die distrik, sê hy daar is groot uitdagings wat voorlê, “maar daar is ’n wil vir elke ding en ek glo dinge sal glad verloop”.Die belangrikste les wat hy uit die praatjies geleer het, is om moed te hou. “Boer met wat jy het, gebruik die hulpbronne wat tot jou beskikking is, en praat met mense. Ons is nie die enigstes wat in moeilike tye sit nie. Ek dink ons kan mekaar aanmoedig.”Vir die onmiddellike toekoms, sê hy daar lê hierdie jaar nog in Oktober vir die MBV ’n braaikompetisie voor. “Kalkrand het verlede jaar gewen, so hulle bied dit weer hierdie jaar aan. Ons het ’n lekker spannetjie ingeskryf en ons is reg om die trofeë in die suide te hou.”’N TERUGBLIKVolgens Ernst Erni, wat die boerevereniging se geskiedenis aan- en opteken, het hy in 1990 by die vereniging aangesluit. “Dit is en bly vir my ’n passie om die boerevereniging se geskiedenis op te teken,” het hy gesêVir hom is die sosiale sy van hulle vergaderings ook altyd ’n belewenis. “Dit gaan nie net oor die boerdery en die belange daarvan nie; die sosiale sy daarvan skep ook vir ons geleenthede. Of ons toer, of ons kuier en net gesellig verkeer na afloop van ’n vergadering – dit alles is vir my ’n belangrike aspek daarvan.”Hy sê voorts hulle probeer ten minste een keer per jaar ’n toer of ’n inligtingsdag aan te bied, “en of ons iewers heen ry of gaan kamp en of ons eenvoudig net op ’n plaas byeenkom, ons verkeer altyd gesellig”. Wanneer dit by hierdie soort geleenthede kom, sê hy hulle pas by die tye aan. “As dit sleg gaan, bly ons in hierdie omgewing, en as dit goed gaan, dan toer ons sommer die land plat.”Ten opsigte van die boeredag, sê Erni die sprekers was indrukwekkend. “Soveel inligting is met ons gedeel. En dan natuurlik ook die bestaande lede; sonder hulle sal ons nie kan aangaan nie. Dit is baie belangrik en die opkoms vandag was regtig goed.” Wanneer dit kom by die geskiedenis van die boerevereniging, sê Erni daar is eintlik so baie inligting om te deel, “maar die feit dat ons ’n hegte groep is wat baie goed saam aanpak en dit maak dat die organisasie voortbestaan. Ons is eintlik maar net ’n gedeelte van georganiseerde landbou. Daar is altyd mense wat vra of ons moet aanhou en voortgaan. . . en dit kom altyd uit een stem dat dit vir seker die belangrikste aspek is – om deel van georganiseerde landbou te wees.”En oor die toekoms, is hy baie opgewonde: “Santam het sommer vandag al hulle hand opgesteek om ons weer te borg, so dinge gaan beslis volgende jaar voort.”Die dag se verrigtinge is afgesluit met ’n veiling om die MBV se finansies te versterk, waarna ’n vertoning deur Adam Tas, gevolg deur Danie Prinsloo en Landie Blaauw, gaste se voete laat stamp het. – gerine@we.com.na

MBV hou groot makietie

Kommentaar

Republikein 2025-08-04

Meld asseblief aan om kommentaar te lewer

MBV hou groot makietie

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie