Dis skoutyd!

Die pas afgelope Grootfontein Skou word as ’n reusesukses beskryf met die Gobabis Landbouskou en Windhoek Landbou- en Lewendehaweskou wat beide vandeesweek afskop.Verskeie veetelers is vol lof oor die goed georganiseerde Grootfontein Skou, met telers wat meer diere as verlede jaar ingeskryf het. Telers het van so ver as Otjiwarongo en Gobabis gekom en dit blyk dat die skoue herstel begin toon ná die Covid-19-pandemie.Altesaam 15 beestelers het vanjaar meer as 120 beeste ingeskryf asook 14 kleinveetelers met 240 stuks kleinvee. Daar was altesaam 84 klasse.GOBABISDie Gobabis Landbouskou skop Donderdag by dié Oostedorp se skougronde af en duur tot Saterdag. Donderdag vind die slagoskompetisie van 36 slagosse plaas. Midde die droogte sal daar 35 beeste op die skou vertoon word, maar die goeie nuus is dat die hoeveelheid kleinvee vanjaar verdubbel het tot 180 stuks kleinvee (bokke en skape). Een van die hoogtepunte is die perdeskou van Skai Arabierperde wat Vrydag plaasvind. Boonop sal daar Vrydag ook ’n verskeidenheid interessante landboupraatjies aangebied word. Die aand word met ’n boere-opskop by die skoudans afgesluit. Die veeparade vind Saterdag plaas waar telers met hul lewende hawe kan spog. WINDHOEKDie Windhoek Landbou- en Lewendehaweskou begin Vrydag in die hoofstad by die skougronde en duur tot 5 Oktober met sowat 430 diere wat ten toon gestel sal word. Top-stoetvee kan daagliks vanaf 07:00 tot 21:00 besigtig word. Altesaam 11 beesrasse en ses kleinveerasse (bokke en skape) sal ten toon gestel word. Die beesskou vind vanaf Vrydag tot Dinsdag 1 Oktober plaas met die 131ste jaarkampioenskap van Simmentaler wat Saterdag aangebied word. Die kleinveeskou vind vanaf Maandag 30 September tot Vrydag 4 Oktober plaas met die Van Rooy-skaapkampioenskap op Woensdag 3 Oktober. Die kleinveeveiling vind op Vrydag 4 Oktober om 10:00 plaas. Die slagoskompetisie vind Vrydag om 14:00 plaas.’n Hoogtepunt is die Feedmaster/Bank Windhoek Jeug- beesbeoordelaarskompetisie met die 21 jong finaliste wat sake op Maandag 30 September sal uitspook. PJ BUDLEREen van die hoogtepunte van die beesskou is die teenwoordigheid van PJ Budler. Hy is ’n hoogs ervare en bekwame internasionale beesbeoordelaar, wat ’n indrukwekkende 95 verskillende beesrasse in 44 lande beoordeel het. Sy toewyding en kundigheid op die gebied van beesbeoordeling is werklik merkwaardig. In 2017 het Budler geskiedenis gemaak deur die eerste beesbeoordelaar te word wat ’n nasionale skou op al ses vastelande gelei het, wat sy reputasie as ’n leier in die bedryf verder verstewig het. Sy uitgebreide kennis en passie vir beesbeoordeling maak van hom ’n gerespekteerde figuur onder telers wêreldwyd. Budler het op ’n beesplaas in Suid-Afrika grootgeword. Op 15-jarige ouderdom het hy BonHaven Beef Cattle gestig. Tussen 1996 en 2012 het hy BonHaven tot vyf plekke in drie verskillende lande laat groei. Die Hereford-, Angus-, Red Angus-, Braford- en Brahman-kuddes het groot sukses behaal deur talle nasionale skoue te wen en veilingsrekords op die vasteland op te stel.In 2012 het PJ na die Amerikaanse deelstaat Texas verhuis, waar hy die internasionale sakebestuurder vir Trans Ova Genetika is. Hierdie posisie, tesame met die bestuur van die jaarlikse “Champion of the World”-kompetisie, die beoordeling van skoue, praatjies by geleenthede en beeskonsultasies het hom tot dusver na 48 Amerikaanse state en 112 verskillende lande geneem. – francoise@nmh.com.na

Dis skoutyd!

Kommentaar

Republikein 2026-03-16

Meld asseblief aan om kommentaar te lewer

Dis skoutyd!

Kommentaar

Republikein 2026-03-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.