Wette teen gays ‘bedreig openbare gesondheid’

Jemima Beukes – Die Internasionale Vigsvereniging (IAS) het ’n beroep op die presidente van Ghana, Namibië en Kenia gedoen om op te staan teen anti-gay wette en waarsku dat die kriminalisering van enige gedeelte van die bevolking, die MIV-pandemie sal aanwakker deur mense uit te sluit van toetsing, behandeling en sorg.Die IAS het ernstige kommer uitgespreek oor die toename in anti-gay politieke en regsaksies oraloor die vasteland. Dit kom nadat Ghana onlangs die wetsontwerp op mense se seksuele regte en Ghanese gesinswaardes goedgekeur het wat gay-wees kriminaliseer.Die IAS se president, Sharon Lewin, het vandeesweek in ְ’n verklaring gesê die organisasie is bekommerd oor hierdie toenemende neiging nadat Namibië se parlement ’n wetsontwerp aanvaar het wat selfdegeslaghuwelike verbied, terwyl dieselfde in Kenia oorweeg word met ’n wetsontwerp wat poog om ernstige strafmaatreëls in te stel.“As hierdie wetsontwerpe as wette aanvaar word, sal dit ’n terugslag wees vir die aansienlike suksesse wat behaal is om die MIV-pandemie te beëindig as ’n bedreiging vir openbare gesondheid en individuele welstand,” het sy gesê.“Dit is tyd vir regerings om pogings op te skerp om die MIV-reaksie te bevorder, nie ons pogings te ondermyn nie. ’n Dringende behoefte bestaan vir die regerings van hierdie lande om saam met, en nie teen, die gemeenskappe te werk nie, wat die kwesbaarste is vir MIV,” het Lewin bygevoeg.Volgens IAS straf 33 van 55 lande gay verhoudings met tronkstraf, en in 2023 alleen het ses lande – Kenia, Ghana, Namibië, Niger, Tanzanië en Uganda – stappe gedoen om anti-gay wette op te skerp.Dit is die meeste aantal lande wat in die afgelope jare dié rigting ingeslaan het en terselfdertyd het sommige van die lande ook die hoogste MIV-getalle.Anti-gay wette word geassosieer met ’n hoër MIV-koers onder mans wat seksuele omgang met mans het.“Seychelle, Lesotho, Botswana, Gaboen en Angola het selfdegeslagverhoudings gedekriminaliseer. Kaap Verde oorweeg ’n wet teen diskriminasie. En mense wat op grond van hul seksualiteit vervolg word, kan steeds asiel in Suid-Afrika soek. Die IAS loof die Afrikalande wat stappe doen om gay regte te beskerm en, deur dit te doen, vordering in die MIV-reaksie te beskerm,” het Lewin gesê. – republikein@republikein.com.na

Wette teen gays ‘bedreig openbare gesondheid’

Kommentaar

Republikein 2025-06-17

Meld asseblief aan om kommentaar te lewer

Wette teen gays ‘bedreig openbare gesondheid’

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie