Uitvoerende hoof van Leonardville in die spervuur

Die uitvoerende hoof van Leonardville, Willie Swartz, is na bewering vir ’n groot deel van die werksweek op die dorpie in die Omahekestreek afwesig.Die nedersettingsraad val onder die Aminuis-kiesafdeling in die Omahekestreek en raadslede en inwoners sukkel glo om dié amptenaar te bereik wat vir die dorp se administrasie verantwoordelik is. Bewerings wat verlede maand aanvanklik deur inwoners geopper is, word nou deur senior raadsamptenare gesteun, wat aan Republikein gesê het dat Swartz soms net vir een of twee dae op Leonardville teenwoordig is voordat hy terugkeer na Rehoboth. “Hy is ons uitvoerende hoof en die een wat rigting gee oor wat gedoen moet word, maar eerlikwaar hy is nooit op kantoor nie. “Die man is altyd in Rehoboth. Wat hy daar doen, weet ons nie,” het ’n raadsamptenaar gesê. Die amptenaar het beweer dat Swartz, nadat hy in November 2025 die amp aanvaar het, ’n amptelike raadswoning toegeken is, maar dit selde bewoon. “Hy is ’n huis gegee wat vir die uitvoerende hoof bedoel is, maar hy is nooit in daardie huis nie. Die huis staan leeg terwyl die regering die koste dra. Hy het ook sy eie kantoor, wat hy met niemand deel nie, maar daardie kantoor is ook leeg,” het die amptenaar beweer. Volgens die bron in die raad verdien Swartz N$24 000 per maand en ontvang hy verblyf- en reistoelae wanneer hy op amptelike sake reis. Republikein kon nie sy vergoeding of die bedrae wat aan hom in reistoelaes betaal is, onafhanklik verifieer nie. Swartz woon saam met sy gesin op Rehoboth, sowat 175 km vanaf Leonardville. Voor hy Leonardville se uitvoerende hoof geword het, het hy van Desember 2015 tot Maart 2018 as bestuurder van korporatiewe sake en menslike hulpbronne by die Rehoboth-dorpsraad gedien. Amptenare van die nedersettingsraad het beweer dat Swartz nie aan raadslede rekenskap gee oor sy verblyfplek nie en dikwels versuim om telefoonoproepe te beantwoord. “Soms sê hy hy woon werkswinkels by, maar die meeste van die tyd gee hy nie rekenskap oor waarheen hy gaan nie. Hy sê vir ons niks en hy antwoord nie sy foon wanneer ons hom bel nie,” het ’n amptenaar gesê. Volgens bronne in die binnekringe van die nedersettingsraad is die saak aan die adjunkminister van stedelike en landelike ontwikkeling, Evelyn !Nawases-Taeyele, gerapporteer. Sy het glo probeer om Swartz te kontak nadat inwoners hul kommer met haar gedeel het, maar kon hom nie in die hande kry nie. PROEFTYDPERKNog ’n raadsamptenaar het Swartz se diensstatus bevraagteken en beweer hy is aanvanklik op ’n proeftydperk van ses maande geplaas en moes deur raadslede geëvalueer word voordat sy aanstelling bevestig kon word. “Hy moes vir ses maande op proeftyd wees. Daarna moes ons as raadslede hom evalueer en bepaal of hy geskik is vir die pos, maar dit is nooit gedoen nie,” het die bron gesê. Inwoners het Swartz ook daarvan beskuldig dat hy versuim om gereelde openbare vergaderings te hou of terugvoer te gee oor kwessies wat tydens gemeenskapsvergadering geopper is. Gemeenskapsaktivis Anton Geinub het aan Republikein gesê inwoners het vertroue in die raad se leierskap verloor, omdat Swartz glo sedert hy die amp aanvaar het, nie betekenisvol met die gemeenskap skakel nie. “Sedert sy aanstelling in November was hy nog nooit vir ’n volle werksdag in die kantoor nie. Hy skakel nie met gemeenskapslede nie en wanneer daar gemeenskapsvergaderngs is, is daar geen terugvoer of opvolg nie. “Ons hoor altyd hy reis ten goede van die gemeenskap, maar daar kom geen goeie goed na ons toe nie,” het Geinub beweer. Die aktivis het gesê inwoners het raadslede gevra waar Swartz is, maar is ingelig dat daar geen bywoningsregister is waarteen sy teenwoordigheid by die werk nagegaan kan word nie. “Verbeel jou, by ’n openbare instelling,” het hy gesê. In ’n verklaring gedateer 28 Julie 2026 wat onder die oë van Republikein was, het inwoners die ministerie van stedelike en landelike ontwikkeling en die Teenkorrupsiekommissie van Namibië (ACC) versoek om die raad te ondersoek. Die groep wil ’n forensiese oudit van die raad se finansies hê en eis dat Swartz geskors word terwyl die ondersoek plaasvind. “Ons versoek groter deursigtigheid oor die kriteria, waglyste en besluitnemingsprosesse wat gebruik word om munisipale erwe toe te ken, aangesien ons glo elke kwalifiserende aansoeker behoort ’n gelyke kans te hê,” lui die verklaring. Inwoners het ook kommer uitgespreek oor die indiensneming van amptenare se familielede en gevra dat werwingsprosesse deursigtig, mededingend en op meriete gegrond moet wees. “Die mense van Leonardville bly verbind tot vreedsame, wettige en konstruktiewe betrokkenheid. Dit gaan nie oor persoonlikhede of politieke verbintenisse nie; dit gaan daaroor om aanspreeklikheid, deursigtigheid en verantwoordelike leierskap te verseker,” lui die verklaring. Inwoners eis ook in die verklaring steeds antwoorde oor ’n inbraak in 2024 by die dorpsraad se kantore, waartydens rekenaarhardeskywe met munisipale inligting glo gesteel is. Die inbraak het plaasgevind voordat Swartz die amp aanvaar het. Raadsamptenare het gesê die verlies van die rekords het die raad se vermoë beïnvloed om akkurate fakture, rekeninge en ander finansiële inligting te lewer. “Daar is in 2024 by die kantoor ingebreek en die hardeskywe is gesteel. Ons kan nie akkurate rekords, fakture en rekeninge aan die publiek gee nie. Ons kan net sommige bedrae skat,” het ’n amptenaar gesê. Hy het gesê Swartz is versoek om die kwessie op te los, maar daar was min openbare kommunikasie oor die ondersoek en of die gesteelde inligting teruggevind is. VERLEDE OP REHOBOTHSwartz se aanstelling as hoof van menslike hulpbronne by die Rehoboth-dorpsraad is voorheen ná ’n ondersoek as onreëlmatig verklaar, waarna hy opdrag gekry het om die pos te ontruim. Hy is later ná dissiplinêre verrigtinge ontslaan. Vroeër vanjaar het die hoërhof egter in Swartz se guns in ’n arbeidsdispuut beslis wat uit sy ontslag voortgespruit het en die Rehoboth-dorpsraad is aanspreeklik vir Swartz se vergoeding van N$2,1 miljoen. In 2016 het Network Media Holdings (NMH) berig dat sommige Rehoboth-inwoners ook Swartz se verwydering geëis het te midde van bewerings van korrupsie. ‘IEMAND JOK’Swartz het die jongste bewerings verwerp en volgehou dat hy nie sy pligte verwaarloos het nie en die bewerings dat hy dikwels van die kantoor afwesig is, as vals beskryf. “Dit is nie waar nie. Iemand jok vir jou en ek weet wie dit is,” het hy gister aan Republikein gesê. Hy het aangevoer dat kritici sy private lewe met sy amptelike verantwoordelikhede verwar en gesê hy besit ’n huis op Rehoboth en waar hy naweke deurbring is “niemand se saak nie”. “Wanneer ek die kantoor verlaat, word die voorsitter ingelig” en met haar vergader en wanneer hy terugkeer vergader hulle weer, het hy gesê. Swartz het bygevoeg dat hy tot Julie vanjaar geen persoonlike assistent gehad het nie en self sy administratiewe werk moes hanteer benewens sy uitvoerende pligte. “Ek het nie die voorregte van ’n PA gehad wat ander uitvoerende hoofde het nie.” Hy het gesê die rol van ’n uitvoerende hoof vereis gereelde reis om vennootskappe te verseker en ontwikkelingsprojekte te bevorder. “Verlede week was ek in vergaderings om projekte, skenkings en borge vir Leonardville op te volg. ’n Uitvoerende hoof is nie aan ’n kantoor verbind nie; ’n uitvoerende hoof is aan plig verbind,” het hy gesê. Swartz bygevoeg dat sy werk verlede week vergaderings met ministers ingesluit het, asook verteenwoordigers van Nedbank en NamPower. Hy het ook die bewering betwis dat hy nie met die gemeenskap skakel nie: “Raadslede is verantwoordelik om gemeenskapsvergaderings te hou; ek is net verantwoordelik om daardie vergaderings te fasiliteer.” Oor bewerings dat sy proeftydperk nooit afgehandel is nie, het Swartz gesê hy het onlangs ’n indiensnemingskontrak van vyf jaar onderteken, wat hy volgens hom aan die raad se voorsitter en die raadskantore voorgelê het. Hy het verder die klagtes afgemaak as gedryf deur “’n baie klein groepie mense” eerder as die breër gemeenskap van Leonardville. Swartz meen dat sommige raadslede hom teenstaan omdat hulle met die vorige raad wat hom aangestel het, verskil het. Die uitvoerende hoof het sy termyn verdedig en gesê hy het reeds ’n dorpsbeplanner verseker ter voorbereiding vir verwagte mynontwikkelings en beleggers gelok wat ’n sonkragprojek van N$200 miljoen beplan, wat volgens hom elektrisiteitskoste kan verlaag en die dorp kan help om sy skuld aan NamPower te verminder. “Verlede week was ek in vergaderings om projekte, skenkings en borge vir Leonardville op te volg.” Swartz het bygevoeg: “Ek het in net onder agt maande meer gedoen as vorige uitvoerende hoofde van Leonardville.” – desmarius@nma.com.na

Uitvoerende hoof van Leonardville in die spervuur

Kommentaar

Republikein 2026-08-04

Meld asseblief aan om kommentaar te lewer

Uitvoerende hoof van Leonardville in die spervuur

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.