Twee nuwe wette is vanjaar goedgekeur

Die Nasionale Vergadering (NV) het sover vanjaar vier wetsontwerpe oorweeg en twee goedgekeur om nuwe wetgewing vir die land te word. Die eerste is die Wysigingswet op Staatsfinansies nr. 1 van 2022 wat op 16 Maart in werking getree het, gevolg deur die Bewilligingswet nr. 2 van 2022 wat vanaf 13 Junie van krag is. Beide wette handel oor staatsbesteding.Verlede jaar het die NV in totaal 11 wetsontwerpe oorweeg en vier goedgekeur. Vier wetsontwerpe het verval en twee is deur die verantwoordelike ministers teruggetrek, terwyl een na ’n parlementêre komitee vir verdere konsultasies verwys is.In 2020 het die NV ses wetsontwerpe oorweeg en al ses is as nuwe wetgewing goedgekeur. Gedurende 2019 het die NV 15 wetsontwerpe oorweeg en 14 goedgekeur en in 2018 is 20 nuwe wette goedgekeur.Volgens die NV se waarnemende woordvoerder, mnr. Rafael Hangula, is die uitbreek van die Covid-19-pandemie in Namibië vir die afname verantwoordelik. “Dis ook belangrik om te noem dat die parlement vroeër as die normale parlementêre kalender in 2019 verdaag het, ter voorbereiding op die presidents- en Nasionale Vergadering-verkiesing. Vanweë die snelle toename in die aantal Covid-19-gevalle, insluitend personeellede, is die land in ’n inperking geplaas wat gelei het dat die parlement sy sittings tot 27 Mei 2020 uitgestel het. Sittings is weer vanaf 28 Julie tot 9 Augustus 2020 opgeskort,” sê hy.Hy sê die NV was in Junie verlede jaar opnuut gedwing om sy bedrywighede op te skort toe Covid-gevalle toegeneem het. Die NV kon eers op 7 September 2021 sy werk hervat. “Die parlement het nietemin drastiese stappe gedoen om te verseker dat sy bedrywighede ononderbroke voortgaan. Dit is bereik deur die opstel van videokonferensiegeriewe wat die parlement in staat gestel het om virtuele sessies te hou, asook die regstreekse uitsending van parlementsittings. “Daarbenewens sal nie alle wetsontwerpe op die lys wat die ministerie van justisie ter tafel gelê het, die Nasionale Vergadering bereik nie,” voeg hy by.Volgens Hangula is die parlement se mandaat nie net beperk tot die deurgee van wetsontwerpe nie, “maar dit voer eweneens die toesigfunksie oor die uitvoerende gesag uit. “’n Aantal openbare verhore en konsultasies is ook gedurende die verslagtydperk gehou,” sê hy. Verskeie vaste komitees se navrae en openbare verhore oor staatsinstellings en aktuele kwessies was by die werk ingesluit. Die kwessies is na die NV verwys, soos die geval met die parlementêre vaste komitee oor natuurlike hulpbronne, wat verskeie openbare verhore oor bekommernisse in verband met ReconAfrica se olie-eksplorasie in Kavango-Oos- en -Wes aangevra het. Die komitee oor geslag-, maatskaplike ontwikkeling en gesinsake het ook ’n aantal openbare verhore in die streke Erongo, Omaheke, ||Kharas, Hardap, Otjozondjupa, Oshikoto en Oshana aangevra. “Hierdie verhore het verband gehou met die drie versoekskrifte wat die Nasionale Vergadering ontvang het rakende die wettiging van aborsie in Namibië, en om die bestaande Wet op Aborsie en Sterilisasie nr. 2 van 1975 te hersien,” sê hy. – augetto@republikein.com.na

Twee nuwe wette is vanjaar goedgekeur

Kommentaar

Republikein 2025-07-01

Meld asseblief aan om kommentaar te lewer

Twee nuwe wette is vanjaar goedgekeur

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie