Swaar reën oorstroom huise in die Noorde

Swaar reën wat die afgelope week oraloor Namibië uitgesak het, het verskeie dorpe in die noorde van die land en in veral informele nedersettings oorstroom wat in vloedvlaktes opgerig is. Dit maak dat baie inwoners nie by hul huise kan uitkom nie. Inwoners van Oshakati se Ehenye- en Ekuku-informele nedersettings is woedend, nadat hul huise weer oorstroom het en dring aan dat die plaaslike owerheid ’n permanente oplossing vind vir die probleme wat met elke reënseisoen ervaar word. Die plaaslike owerheid sê egter die oorstromings is die gevolg van sommige inwoners wat hul erwe met sand opvul wat tot die oorstromings lei by erwe waar dit nie gedoen is nie. Die owerheid plaas ook die blaam op kontrakteurs wat die huise gebou het en sê hulle moes hoër fondasies gebou het. Netwerk Media Hub (NMH) berig reeds die afgelope paar jaar oor huise in die vloedvlaktes wat gedurende die reënseisoen oorstroom en dit moeilik maak vir inwoners om by hul huise te kom. Poele water kan in die geraakte erwe gesien word, met die water wat selfs huise met lae fondasies oorstroom. Dit lei daartoe dat sommige inwoners kies om gruissand te koop om hul erwe op te vul. Diegene wat dit nie kan bekostig nie, moet hoop dat hulle swaar reën gespaar sal word. "Ons huise is oorstroom en dit is elke reënseisoen die geval. Ons was desperaat om huise te besit, maar nou staar ons hierdie uitdaging in die gesig. Ander dorpe het behoorlike stormwaterkanale, maar ons moet so ly," het ’n ontstigte inwoner van Ehenye gesê. Die burgemeester van Oshakati, Leonard Hango, het gesê die raad moet nog baie doen in terme van die oprig van meer stormwaterkanale in die gebiede wat geraak word. "Die oplossing lê by die inwoners self, want teen die pas wat hulle hul eie erwe vol maak, onderwerp hulle ander aan oorstroming," het Hango gesê. "Ek dink ons kort ’n ander benadering. Ons moet hulle paraat maak daarop hoe om dit te doen. As almal dit net doen, kry hulle net poele water in ander mense se erwe," het hy gesê.Hango het verder gesê dat sommige ontwikkelaars versuim het om te voldoen aan die vereistes vir die vlakke wat fondasie van huise in gedienste gebiede moet wees. Dit veroorsaak dat stormwater in huise vloei. "Wanneer die water in die huis instroom, beteken dit jou huis se fondasie is laer as wat vereis word. Daarom moes hulle hieraan voldoen. Dalk is dit iets wat inwoners nie vantevore geweet het nie, of hulle het dit ignoreer. Dalk is dit die ontwikkelaars, want van hulle het hul huise deur ontwikkelaars gekry," het Hango gesê. ’n Video van 'n vloed by Ondangwa se uitbreiding 24 doen ook tans die rondte op sosiale media. Volgens die dorp se uitvoerende hoof, Ismael Namugongo, het Ondangwa op dié betrokke dag swaar neerslae gehad en kon die uitbreiding se dreineringstelsel nie die groot hoeveelheid water hanteer nie. "Ek het ook die video gesien. Nadat die reën gestop het, kon ons die water deur ons stormwaterkanale stuur. Op dié spesifieke dag het ons baie reën ontvang en die dreineringstelsel kon dit nie alles gelyktydig hanteer nie," het hy verduidelik. Namuongo het erken die raad het nie ’n meesterplan om stormwater te hanteer nie. "Elke nedersetting, huis of enige bouprojek in die dorp is gebou in lyn met ons stormwaterstelsel," het hy gesê. - republikein@republikein.com.na

Swaar reën oorstroom huise in die Noorde

Kommentaar

Republikein 2026-05-05

Meld asseblief aan om kommentaar te lewer

Swaar reën oorstroom huise in die Noorde

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.