Staatsvoertuie 'stukkend en oud'

Henriette Lamprecht - ’n Erg verouderde vloot met sommige voertuie wat 20 jaar en ouer is, ongebruikte staatsvoertuie wat vir maande en jare by werkswinkels stof opgaar weens ’n gebrek aan onderdele en geldige lisensies, met die verkryging van iets so klein soos ’n gloeilampie wat, as jy gelukkig is, tot ses maande kan neem om uiteindelik op te daag. Dit is die verwoestende impak volgens ’n spesiale komitee, wat ’n moratorium op die aankoop van enige staatsvoertuie op die bestaande “ou en oorgebruikte” vloot gehad het. Die moratorium op die regeringsvloot wat op 1 Februarie 2018 uitgereik is, se doel was om aankope van voertuie te beperk as deel van besparingsmaatreëls.’n Voorbeeld van die impak is die ministerie van gesondheid en maatskaplike dienste se direktoraat vir gesondheid in die Zambezi wat tans net vier ambulanse het vergeleke die 15 in 2016 wat in ’n lopende toestand was. Dit maak dit bykans haas onmoontlik om op dringende verwysings van verskeie klinieke in die streek te reageer.Die jaarlikse bespuitingsprogram teen malaria, sowel as immuniseringsprogramme in die streek moes ook noodgedwonge weens ’n ernstige tekort aan voertuie laat vaar word. 'VLOOT ONBETROUBAAR'Die nasionale raad se staande komitee oor vervoer, infrastruktuur en behuising, sê in ’n verslag die huidige vloot is onbetroubaar en duur om in stand te hou. Dit veroorsaak dat voertuie by regeringsgarages geparkeer word waar die werkswinkel tot duisende of miljoene dollar se skuld ly. Regeringskantore, ministeries, agentskappe en streekrade is dit almal eens dat die regering se werkswinkels nie ten volle toegerus is en die nodige kapasiteit het om gehalte-ondersteuningsdienste te lewer nie. Luidens die verslag is die 11 landswye regeringsgarages sinoniem met geparkeerde stukkende voertuie weens geringe of ernstige tegniese probleme.“Regeringsgarages kom nie hul mandaat na nie, omdat dit in ’n ekonomiese las ontaard het,” aldus die verslag.Die komitee verwys ook na ’n swak bestuurstelsel by die werkswinkels weens die afwesigheid van die gereelde en sistematiese kapasiteitsbou om vakmanne in staat te stel om die nuutste voertuigmodelle te kan diens. Die aflewering van goedere en ander noodsaaklikhede vanaf die werkswinkels na Windhoek word ook vertraag weens die afwesigheid van ten volle funksionerende koerierdienste. Die hulp van private voertuie wat van die streke na die hoofstad reis, word dan ten koste van werknemers ingespan. ERGE ONSEKERHEIDDie moratorium het ook ’n beduidende impak op dienslewering en het erge onsekerheid oor amptelike reisroetines geskep. Die sentralisering van mag in terme van aankope, onderfinansiering, die afwesigheid van ’n betroubare, funksionerende koerier en ’n gebrek aan outonomie deur regeringsgarages veroorsaak verskeie struikelblokke en belemmer die doeltreffendheid van vervoer en dienslewering. By die meeste werkswinkels sit die meerderheid van opgeleide personeel en duime rol aangesien daar geen onderdele is om die stukkende voertuie te herstel nie. Die blaam hiervoor word voor die deur van die sentrale verkrygingstelsel geplaas wat in Windhoek is, met een persoon wat verantwoordelik is vir die 11 werkswinkels landswyd. “Dit het die spoedige herstel van voertuie belemmer omdat die verkryging van klein onderdele soos ’n gloeilamp tussen drie tot ses maande kan neem om afgelewer te word,” lui die verslag. Klagtes is ook aan die komitee geopper oor private werkswinkels wat hulle rekeninge laai wanneer hulle aan staatsvoertuie werk. Die N$3,50 per kilometer vir amptelike reise is ook nie markverwant nie en voldoen nie aan die huidige vraag in verhouding tot die verhoogde pryse van basiese produkte, sowel as verblyfskoste wat verstyg het nie. Die regering het in Januarie aangekondig hy gaan 30 Toyota Fortuners en twee Toyota Land Cruisers (V8) aankoop vir amptelike gebruik deur staatsamptenare. Die Land Cruisers is net vir gebruik deur die eerste minister, die Speaker, die adjunk- eerste minister en oudpresidente. Die ministerie van werke en vervoer het N$25 miljoen vir dié aankope begroot. – henriette@republikein.com.na

Staatsvoertuie 'stukkend en oud'

Kommentaar

Republikein 2025-04-30

Meld asseblief aan om kommentaar te lewer

Staatsvoertuie 'stukkend en oud'

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie