SSC-salarisse 'te hoog'

Hoofredaksie - Die soektog na die volgende uitvoerende hoof van die Maatskaplike Voorsorgkommissie (SSC) is skielik opgeskort nadat die kabinet alarm gemaak het oor wat as opgeblase uitvoerende salarisse en “lagwekkende” ledevoordele by die instelling beskou word. Na wat verstaan word het die minister van justisie en arbeidsverhoudinge Wise Immanuel, die SSC-raad opdrag gegee om die werwingsproses onmiddellik te staak hangende ’n hersiening van die vergoedingstrukture by die kommissie.Die stap volg te midde van regeringsdruk vir verbeterde uitbetalings vir maatskaplike beskerming en in veral kraamvoordele. President Netumbo Nandi-Ndaitwah het na bewering gelas dat hersiene SSC-voordele teen Junie vanjaar ten volle geïmplementeer moet wees.Volgens bronne wat met die kwessie vertroud is, glo Immanuel dat betekenisvolle voordeelverbeterings slegs moontlik sal wees indien SSC-vergoeding in lyn gebring word met perke wat vir Vlak 2-openbare instellings geld.Volgens wat Network Media Hub (NMH) verstaan verdien die SSC se uitvoerende hoof sowat N$2,6 miljoen per jaar, ongeveer N$216 000 per maand.Senior uitvoerende beamptes verdien na bewering sowat N$2,1 miljoen per jaar, of ongeveer N$175 000 per maand. Middelvlakbestuurders se pakkette word op N$1,6 miljoen per jaar geraam, soortgelyk aan die salaris van eerste minister Elijah Ngurare.Volgens onlangse berigte ontvang die eerste minister ’n basiese salaris van N$1,3 miljoen, saam met ’n behuisingstoelaag van N$351 175.Ministers, die prokureur-generaal en direkteure-generaal verdien N$1,34 miljoen per jaar, insluitend ‘n basiese salaris van N$1 miljoen en ’n behuisingstoelaag van N$273 311.Bronne sê Immanuel het die kabinet se kommer oorgedra dat SSC-vergoedingsvlakke beduidend bo voorgeskrewe drempels is. Dit ondanks die feit dat die kommissie as ’n maatskaplike instelling en ’n Vlak 2-entiteit geklassifiseer word.“Die salarisse is bo alle perke, terwyl werkers se voordele lagwekkend is,” het ’n senior regeringsamptenaar gesê wat met die besprekings vertroud is.“Die huidige voordele kan nie aan lede se finansiële behoeftes voldoen nie, veral vroue met kraamverlof. Die kraamverlofvoordeel staan op N$11 500,” het die beampte gesê.’n Ander bron het die regverdiging vir die vergoedingsvlakke bevraagteken.“Wat presies doen ’n uitvoerende hoof van die SSC om al daardie geld te regverdig, wanneer al wat hulle as ’n fonds doen is om werknemersbydraes te ontvang? Dis nie asof hulle alles inspan om daardie geld te gaan soek nie,” het die bron gesê.Die kabinet het na bewering die ministerie van arbeid, saam met die kabinetskomitee oor die staatsdiens, opdrag gegee om ingrypings te ontwikkel wat daarop gemik is om SSC-vergoeding te herstruktureer, ten einde die loonrekening te beperk en hulpbronne na ledevoordele te herlei.Die werwingsproses is gevolglik gevries hangende die uitkoms van die opdrag. Immanuel het by navraag bevestig dat hy volgens kabinetsriglyne optree. Laasgenoemde is uitgereik ná kommer wat president Nandi-Ndaitwah oor die situasie by die SSC geopper het.“Ek hanteer ’n ware bekommernis wat deur die staatshoof geopper is,” het Immanuel kortliks gesê.Die publikasie Namibia Business Review het onlangs berig dat kandidate wat met die CEO-pos verbind is, Elvis Nashilongo, Kapena Tjombonde, Ndangi Katoma en die sakeman Ndeulipula Hamutumwa insluit.Daar word ook verwag dat die regering tussentydse operasionele reëlings sal aankondig sodra die kontrak van die huidige SSC-uitvoerende beampte, Milka Mungunda, verstryk.Intussen is die ministerie van arbeid en finansiële owerhede na bewering getaak om SSC se finansiële rekords te ondersoek om te bepaal of die instelling die kapasiteit het om maatskaplike beskermingsvoordele beduidend te verbeter.Die SSC-raad is verder opdrag gegee om teen 29 Mei 2026 aanbevelings in te dien oor hoe ledevoordele – veral kraamverlofuitbetalings – in die 2026 - ‘27-boekjaar ná groeiende openbare kritiek oor die huidige voordeelvlakke verbeter kan word. - republikein@republikein.com.na

SSC-salarisse 'te hoog'

Kommentaar

Republikein 2026-07-22

Meld asseblief aan om kommentaar te lewer

SSC-salarisse 'te hoog'

Kommentaar

Republikein 2026-07-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.