Sensus: Namibiërs se ‘stille protes’

Jemima Beukes - ’n Mengsel van misverstande, taalhindernisse, oënskynlike wantroue in die Swapo-regering en die uitdagende lewensomstandighede in plakkershuise gooi ’n donker skadu oor die vordering van die 2023-bevolking- en behuisingsensus. Die politieke ontleder Ndumba Kamwanyah sê wat tans in die land afspeel, is ’n “tipe van openbare protes” en afkeur oor die rigting waarin Namibië beweeg. “Die boodskap is duidelik vir ons huidige regering en veral Swapo, die wittebrood is verby. Dit wek ook morele en filosofiese vrae. Hoe wil jy ’n hawelose, ’n arm persoon of ’n werklose persoon tel wat nie deel in die land se vooruitgang nie? Dit is jammer dat die sensus in die gedrang kom oor die regering se mislukking om dienste te lewer,” het hy gesê.Volgens hom is Namibiërs se teëstand ’n aanduiding dat inwoners moeg is van leë beloftes en simboliese en retoriese politiek wat nie hul lewens verbeter nie. “Dit dui op geen vertroue nie. Namibiërs het nog nooit vantevore geweier om tydens ’n sensus getel te word nie. Wat ons sien is werklik ’n nuwe neiging in ons politiek. Die regering moet aandag hieraan skenk en die situasie hanteer. ’n Sensus is ’n noodsaaklike hulpmiddel vir openbare beplanning en het ernstige implikasies vir die welstand van die samelewing. Mense vertrou nie meer die regering nie.” PROTESSommige Namibiërs oraloor die land weier glo om getel te word en beeldmateriaal wys hoe inwoners eerder kies om sensus-veldwerkers oor die gebrek aan behuising en die kwaliteit van hul sinkhuise, sommige blote saamgeflanste plastiek en karton, te konfronteer. Aan die ander kant het sommige boere en lodge-eienaars glo hul hekke gesluit en na bewering verkies om die veldwerkers met vrae en vloekwoorde te peper. “Moenie mense se tyd mors nie! Waarvoor het jy die bykomende inligting nodig?” is glo gevra. Volgens een lodge-eienaar moet mense nie getel word by hul werksplekke soos lodges nie, maar eerder wanneer hul tuis is by hul huise. In nog ’n voorval het ’n boer glo beamptes op sy plaas gekonfronteer omdat hulle rondgery het om vas te stel hoeveel geboue daar op die plaas is. Ten spyte van beamptes wat die konteks van die vrae probeer verduidelik het, het die boer glo gesê hy kan nie verstaan wat die regering se belangstelling in ’n ou gebou op ’n plaas is nie.Die Namibië Statistiekagentskap (NSA) se uitvoerende hoof en statistikus-generaal, Alex Shimuafeni, sê die agentskap het ontstellende klagtes oor die naweek ontvang. Hy het gemaan Namibiërs staar ’n boete van N$50 000 en tronkstraf van vyf jaar in die gesig sou hulle weier om getel te word. “Ek het gevalle gesien waar hulle ons vertel hoe om ons werk te doen. Basies is die sensus net soos enige ander opname, daar is die kwessie van demografie waar jou ouderdom inkom. As hulle vra watter tipe vloere is in jou huis en waarmee is dit bedek, dui dit aan ons die vlak van ontwikkeling van mense en hoe hulle leef,” het hy gesê.Die sensus het op 18 September afgeskop en duur tot 3 November.– republikein@republikein.com.na

Sensus: Namibiërs se ‘stille protes’

Kommentaar

Republikein 2025-05-01

Meld asseblief aan om kommentaar te lewer

Sensus: Namibiërs se ‘stille protes’

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie