Reho se nedersettings kry rigting

Inwoners van Kawuki, een van Rehoboth se informele nedersettings, het laas week vanaf Dinsdag tot Vrydag vreedsaam verskuif om plek te maak vir die bou van ’n gesondheidsentrum, ’n Nampol-satellietkantoor en ’n gemeenskapsentrum. Die gemeenskap is hervestig op toegekende grond in Volstruisvlakte en Burgershoek, volgens die Rehoboth-dorpsraad.Die dorpsraad se woordvoerder Desire Pieters sê die verskuiwing van die mense was moontlik danksy die leierskap van raadslid Harald Kambrude en gemeenskapslede Karl January en Waldo Brockerhof, wat vrywillig en kosteloos vragmotors hiervoor voorsien het. Sy het die bydrae geloof en moedig ander gemeenskapslede om ook die dorpsraad by te staan.Die onlangse vordering kom ondanks foute in die toekenning van grond in Bahnhoff, wat laas jaar die ontwikkelingsproses tot stilstand gebring het. Sondag het die dorpsraad openbare vergaderings gehou in die Burgershoek gebied, en onder die Bahnhoff-gemeenskap se boom, waar onder meer die herlewing van plaaslike ontwikkelingskomitees aangepak is. Nuwe lede vir die Bahnhoff ontwikkelingskomitee is eenparig verkies en hul aanstelling moet deur die dorpsraad goedgekeur word, sê Pieters. Die nuwe lede van die ontwikkelingskomitee is voorsitter Hendry Jagger en sy adjunk Michael Bussel, saam met Memory #Goses, Maria Dax, Rudolf !Gomuseb, Altinus Moses en Jakobus !Hoxabeb.Die komitees beywer hulle vir vrywillige insameling van inligting en besonderhede oor inwoners se lewensomstandighede, wat met hulp van die Namibia Housing Action Group en finansiering van die GIZ, gebruik word om woonbuurte van nuuts af te beplan, vir uiteindelike formalisering.REËLS UITGELÊBahnhoff-inwoners is Sondag herinner aan die kennisgewing in Januarie dat erwe aan Rukoro begunstigdes in die buurt toegeken word. Hiervoor het opmeting van Bahnhoff se nuwe uitbreidings (2 en 4) reeds begin. Die Rukoro-verslag is in 1992 deur die kabinet goedgekeur, waarin sowat 3 000 begunstigdes opgeteken is. Goedgekeurde Rukoro-begunstigdes sal N$6 600 moet betaal (N$5 000 vir die grond en N$1 600 vir die opmeting), voeg sy by. Bouplanne moet eers deur die dorpsraad goedgekeur word voordat in die nuwe uitbreidings gebou kan word. Geen sinkhuise word toegelaat nie en maandelikse tariewe en belasting sal van toepassing wees. Elke stuk grond is 356 vierkante meter.Volgens Pieters het die Rehoboth dorpsraad besluit om nie onwettige inwoners van Volstruisvlakte en Burgershoek uit te sit nie, maar om die nedersettings te beplan en inwoners daarvolgens te verskuif. “Die gebied was reeds beplan, maar weens grondgryping en onwettige beset kon ontwikkeling nie voortgaan nie. Mense het dit baie moeilik gemaak om met beplanning voort te gaan, omdat hulle meestal daar waar grootmaat toevoerlyne en paaie sou kom, huise opgeslaan het. “Dié situasie het geweldige druk op die raad gesit, omdat dieselfde mense wat onwettig grond beset ook op dienste en eienaarskap aandring,” brei sy uit.Boonop grondgryping is die verwydering van penne waarmee erwe afgebaken word ’n groot hindernis, wat vereis die proses moet oor begin, sê Pieters. Die versameling van inligting in Bahnhoff en Volstruisvlakte vorder weer, nadat dit van voor af moes begin. Die nuwe buurtplanne sal vir goedkeuring aan die raad gegee word, nadat alles voltooi is en mense daarvolgens verskuif is. Hierna sal opmeting tot formalisering lei. – augetto@republikein.com.na

Reho se nedersettings kry rigting

Kommentaar

Republikein 2026-02-03

Meld asseblief aan om kommentaar te lewer

Reho se nedersettings kry rigting

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.