President verleng Noa se ampstermyn

President Netumbo Nandi-Ndaitwah het die ampstermyn van die direkteur-generaal van die Teenkorrupsiekommissie van Namibië (ACC), Paulus Noa, met twee maande verleng sodat hy toesig kan hou oor die oorgang van die inkomende leierskap.

Die verlenging kom juis toe Noa op Vrydag 31 Julie sou aftree, nadat hy sedert die instelling se stigting in 2006 as die ACC se eerste en enigste direkteur-generaal gedien het. 

Met die bevestiging van die ontwikkeling, het Noa Woensdag aan Republikein gesê hy het reeds voorberei om die amp te verlaat toe die kantoor van die president hom van sy besluit in kennis gestel het.

“Aftrede het nog nie vir my begin nie. Ek is nog vir nog ’n paar maande in die amp,” het hy gesê.

“Net toe ek om 17:00 Vrydag sou vertrek, het ’n brief van die president ingekom met die versoek dat ek vir nog twee maande aanbly. 

“Dit is om ’n gladde oorgang met die nuwe inkomende direkteur-generaal voor te berei,” het hy bygevoeg.

Die verlenging op die nippertjie is bedoel om ’n ordelike oorhandiging aan die direkteur van die Finansiële Intelligensiesentrum, Bryan Eiseb, te verseker, wie se aanstelling as die ACC se volgende direkteur-generaal verlede maand deur die parlement goedgekeur is.

Noa, nou 62, is in 2006 vir die eerste keer as die ACC se direkteur-generaal aangestel en het daarna vir 20 jaar gedien. Sy aanvanklike aftreedatum was 31 Julie.

Sedert die ACC sy deure geopen het, het dit 7 503 klagtes geregistreer.

Daarvan is 3 459 van die hand gewys, omdat bevind is dat dit persoonlike geskille, administratiewe aangeleenthede of bewerings buite die kommissie se mandaat behels.

’n Verdere 4 044 sake is ondersoek.

In ’n onderhoud met Republikein verlede maand het Noa gesê 2 812 ondersoeke is afgehandel, terwyl 92 sake tans op besluite van die aanklaer-generaal wag.

Die presidensiële woordvoerder, Jonas Mbambo, het die ontwikkeling bevestig en gesê Eiseb sal op 1 Oktober die amp aanvaar, terwyl Noa as waarnemende direkteur-generaal sal dien.

“Hierdie reëling sal hom in staat stel om uitstaande verpligtinge wat met sy vorige rol verband hou, af te handel,” het Mbambo gesê.

“Om kontinuïteit in die leierskap en bedrywighede van die kommissie gedurende die tussentydse tydperk van twee maande te verseker, is Paulus Noa, die uittredende direkteur-generaal, aangestel om as waarnemende direkteur-generaal te dien,” het Mbambo gesê.

Tydens Noa se ampstermyn het die kommissie gespesialiseerde direktorate vir ondersoeke, openbare opvoeding en voorkoming van korrupsie en geldwassery, forensiese ondersoeke en intelligensie gevestig.

Streekkantore is ook in Oshana, Otjozondjupa, Kavango-Oos en Erongo geopen.

Die ACC het vandeesweek twee groot aanstellings aangekondig van senior ondersoeker Oberty Inambao as sy waarnemende hoof van ondersoeke en Justine Kanyangela as sy waarnemende uitvoerende direkteur.

Inambao het in 2009 vir die eerste keer by die ACC aangesluit. Hy is ’n sleutelfiguur in die voortgesette korrupsiesaak van Namcor en Enercon, nadat hy ondersoeke gelei het wat verlede jaar tot massa-arrestasies gelei het.

Daar word verwag dat Eiseb ’n organisasie sal erf wat onder toenemende druk is om hoëprofiel-ondersoeke af te handel, insluitend dié wat met die Fishrot-korrupsieskandaal verbind word.

– [email protected]