Plaaslike jeug ‘aktiewe argitekte van vandag se transformasie’

“Ons moet verseker dat ons jongmense: Die innoveerders, navorsers en die entrepreneurs nie net toeskouers is nie, maar aktief deelneem en voordeel uit elke fase van Namibië se energie-ontwikkeling trek.”Só het die hoof van die Upstream-petroleumeenheid in die kantoor van die president, Kornelia Shilunga, namens president Netumbo Nandi-Ndaitwah gesê.Die president was Woensdag die hoofspreker by die amptelike bekendstelling van die Namibië Jeugenergieforum (NYEF) se Namibia Energy Connect & Energy Trailblazer-toekennings by Droombos buite Windhoek.NYEF spog reeds met meer as 1 000 lede, meestal in Windhoek, Walvisbaai en Lüderitz, onder leiding van ’n raad en bestuursgroep, volgens die stigter en raadslid, Fanuel Shinedima.Shilunga het Woensdagoggend namens die president gesê dat “Namibiese jeug nie net die leiers van môre is nie, maar aktiewe argitekte van vandag se transformasie”.Volgens die president moet Namibië se jongmense toegerus word om leiers in eksplorasie, vervaardiging, hernubare vernuwing en beleidsontwerp te word.“Dit beteken deure moet oopgemaak word vir jong ingenieurs, geowetenskaplikes, omgewingsbewustes, ekonome en entrepreneurs om hul regmatige plek in die vorming van Namibië se energiesektor in te neem.”Nandi-Ndaitwah sê Namibië se opkoms as ’n energiegrens, met die ontdekking van olie en gas en wêreldklas hernubare potensiaal, “bied ons ’n geleentheid wat min generasies nog ooit ervaar het”. Sy sê egter verder: “Maar dit plaas ook ’n diepgaande verantwoordelikheid voor ons: Om te verseker dat hierdie energierykdom omskep word in inklusiewe, volhoubare en regverdige groei.”Dié doelwit kan egter nie deur die regering alleen bereik word nie, volgens die president.“Ek doen dus ’n beroep op bedryfsleiers, beleggers en ontwikkelingsvennote om vennootskappe met die Namibiese jeug te versterk, nie deur die minste te doen nie, maar deur tasbare mentorskap, finansiering en geleenthede,” het Nandi-Ndaitwah gesê.TotalEnergies se uittredende streekbestuurder in Namibië, Laurent Roché, en sy plaasvervanger, Mariam Kane-Garcia, was teenwoordig om dié oliereus se toewyding aan die ontwikkeling van Namibië se jeug te toon deur ’n Memorandum van Verstandhouding (MoU) met die NYEF tydens die geleentheid te onderteken.Volgens Kane-Garcia is die ooreenkoms dat TotalEnergies die forum deur ondersteuning sal aanspoor om tasbare ingrypings, soos die toekennings, te fasiliteer.“Die jeug het ’n werklike rol om te speel, wat passie, die vermoë om risiko’s te neem en indiensopleiding vereis,” sê sy.Namibië se petroleumkommissaris, Maggy Shino, het ook die geleentheid gehad om die vordering met die beleid oor nasionale plaaslike inhoud vir die oliebedryf aan te bied.Die beleid maak voorsiening vir ’n gefaseerde inwerkingstelling en om saam met die bedryf te groei, om maksimum voordeel aan Namibiërs te bied, strategiese sektore te prioritiseer en bevoegdheid aan te moedig. Dit doen ’n beroep op kapasiteitsbou en vennootskappe tussen die regering en die bedryf.“Die regering sal nie net ’n inspekteur en reguleerder wees nie, maar ook ’n speler en ondersteuner. Dit vereis oop en eerlike gesprekke,” sê sy.“Die aanvaarding van die beleid is nou aan die gang, nadat ons landswye konsultasies byna voltooi is. “Die finale konsultasie sal voor die einde van die jaar in Khomas gehou word. Ons hoop om die beleid in Januarie 2026 goed te kan keur,” het Shino gesê. – augetto@nmh-hub.com.naKlik hier om na ’n gedeelte van die toespraak te kyk wat Kornelia Shilunga namens Netumbo Nandi-Ndaitwah gelewer het: q.my.na/RWTX

Plaaslike jeug ‘aktiewe argitekte van vandag se transformasie’

Kommentaar

Republikein 2026-01-12

Meld asseblief aan om kommentaar te lewer

Plaaslike jeug ‘aktiewe argitekte van vandag se transformasie’

Kommentaar

Republikein 2026-01-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.