Parlement open vandag

Die Nasionale Vergadering (NV) hervat vandag sy normale sake nadat die opening vir 2025 gister uitgestel is ter ere van wyle president Hage Geingob wat op 4 Februarie 2024 oorlede is.Volgens die parlement is die wetsontwerp op openbare vergaderings en optogte eerste op die lys van sake wat voor 21 Maart voltooi moet word. Vandag sal die tweede sitting van hierdie omstrede nuwe wetsontwerp wees, met debatvoering wat sal voortduur.Die wetsontwerp vereis onder meer dat kennisgewing van enige optog minstens vyf dae voor die tyd by die naaste Namibiese polisiestasiebevelvoerder ingedien word en dat die polisie toestemming vir die optog moet gee.Verder moet ’n organiseerder vir die optog geïdentifiseer word, wat aan ’n jaar se gevangenisstraf of ’n boete van N$5 000 onderwerp kan word, ingeval enige vereiste vervat in die nuwe wet nie nagekom word nie, of as onrus, skade of geweld as gevolg daarvan uitbreek.Verlede jaar is die wetsontwerp deur verskeie politici en nieregeringsorganisasies as ongrondwetlik bestempel, “die onderdrukking van opposisiestandpunte en is regressief ten opsigte van vryhede wat Namibiërs sedert onafhanklikwording geniet”.Tans is dit die Namibiese polisie (Nampol) se praktyk om aan te dring op ’n kennisgewing en goedkeuring voor optogte, terwyl optoggangers ook ’n paar honderd dollar moet opdok om voorsiening vir polisieteenwoordigheid by enige optog te maak.Die langverwagte paaie-wetsontwerp is tweede op die lys van onderwerpe wat die NV se aandag verg. Daarna sal die parlement aandag gee aan die wetsontwerp vir die stigting van streek- en kiesafdelingsontwikkelingsfondse.Die NV beplan ook om die debatvoering te hervat in verband met die onttrekking van water uit die Ohangwena-akwifer, wat ’n noodsaaklike waterbron vir die betrokke streek en noordelike Namibië in die algemeen kan bied.Verder sal ’n mosie wat deur die Landless People’s Movement (LPM) se Utaara Mootu gebring is, in verband met die onteiening van grond van buitelandse afwesige eienaars sonder vergoeding, aandag geniet.“Die era van buitelandse uitbuiting is verby, ons grond sal tot voordeel van ons mense teruggeëis word,” lui Mootu se mosie.Die Popular Democratic Movement (PDM) se parlementslid, Inna Hengari, se mosie in verband met die beskerming wat Namibië se wetgewing aan burgers met skuld bied, is laaste op vandag se lys van onderwerpe vir bespreking aangeteken. – augetto@nmh-hub.com.na

Parlement open vandag

Kommentaar

Republikein 2025-12-18

Meld asseblief aan om kommentaar te lewer

Parlement open vandag

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.