Nuwe nasionale minimumloon van krag

Die nasionale minimunloon van N$18 per uur het op 1 Januarie 2025 in werking getree. Die hoofsekretaris van die Namibiese Unie vir Voedsel- en Verwante Werkers (Nafau), Jacob Penda, het tydens 'n nuuskonferensie in Windhoek werkgewers gemaan om aan die loonvereiste te voldoen. l. Die nuwe minimumloon word uiteengesit in die Staatskoerant 8409 wat op 7 Augustus verlede jaar gepubliseer is. Penda het 'n beroep op die regering en alle rolspelers gedoen om dit af te dwing en swaar strawwe uit te reik wat nie daarby hou nie. Die strawwe sluit onder meer boetes in en dat besighede se handelslisensies teruggetrek word. Volgens die staatskoerant kry plaaswerkers egter eers net N$10 per uur, tot die begin van volgende jaar wanneer hulle beloning na N$14 per uur sal vermeerder. Teen 1 Januarie 2027 sal plaaswerkers se nasionale minimumloon van N$18 per uur in werking tree. Huiswerkers se basiese minimumloon vir vanjaar is N$12 per uur en styg aanstaande jaar tot N$15 per uur. Vanaf Januarie 2027 sal ook huiswerkers se minimumloon op N$18 per uur staan. Die verhoging van lone sluit nie ander voordele in nie. Volgens die Staatskoerant kan die waarde van bykomende voordele nie van die minimumloon afgetrek word nie. Penda het die nuwe wetgewing as 'n mylpaal beskryf en gesê dit verteenwoordig 'n basiese reg vir werkers wat ten doel het om hul lewenstandaarde te verbeter. Dit ook om billike arbeidspraktyke te verseker. “Dit is veral belangrik vir Nafau wat 'n meerderheid werknemers in onder meer die visvang-, kleinhandel-, gasvryheids- en toerismesektor verteenwoordig,” sê hy. Lede van die vakbonde en Namibiese werknemers in die algemeen sal deur die nuwe minimumloon 'n verlaging in armoede en ook verbeterde toegang tot gesondheidsdienste en tot onderwys verseker, het Penda gesê. Dit sal volgens die vakbondleier ook die ekonomie help versterk en 'n meer billike en regverdige samelewing vir almal help vestig. Penda het 'n beroep op die ministerie van arbeid, nywerheidsbetrekkinge en werkskepping gedoen om hande te vat met die kantoor van die arbeidskommissaris om ‘n toegewyde span saam te stel wat die nasionale minimumloon kan afdwing. Die vakbond het ook gevra dat ander rolspelers insluitend die Namibiese Inkomsteagentskap (NamRA) en die Maatskaplike Voorsorgfonds (SCC) help om bewusmaking oor die nuwe minimumloon te bevorder. Penda sê die regering het verlede jaar oor 'n breë front omvattende konsultasies oor die nuwe minimum loon gedoen en geen besware is aangemeld nie. Volgens hom is daar dus geen verskoning hoekom enige Namibiese werkgewer dit nie kan betaal nie. Penda sê afdankings sal nie as gevolg van die nuwe loonvasstelling nodig wees nie en die vakbond verwag nie verhoogde werksverliese as gevolg van die verhogings nie. Nafau en alle ander vakbonde onder die vaandel van die Nasionale Unie vir Namibiese Werkers (NUNW) het ook 'n beroep gedoen dat dié wat nie die nuwe nasionale minimumloon toepas nie, by hul kantore oraloor die land aangemeld moet word sodat dit met die arbeidsministerie opgeneem kan word - augetto@nmh-hub.com.na

Nuwe nasionale minimumloon van krag

Kommentaar

Republikein 2026-02-02

Meld asseblief aan om kommentaar te lewer

Nuwe nasionale minimumloon van krag

Kommentaar

Republikein 2026-02-02

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.