NHE-werkers stem vandag oor staking

Die Nasionale Behuisingsonderneming, die staatsonderneming beter bekend as NHE, se werknemers sal vandag stem oor of hulle tot staking sal oorgaan.Die sekretaris-generaal van die Staatsdiensunie van Namibië (PSUN), Matheus Haakuria, het gisteroggend aangekondig dat werknemers geen ander keuse as nywerheidsoptrede het nie.In ’n verklaring wat NHE se bestuur gistermiddag uitgereik het, sê die bestuur ’n staking sal ernstige finansiële gevolge vir die onderneming meebring. NHE se woordvoerder, Taufi Shafombabi, sê “die dreigende staking sal meer skade aan die organisasie aanrig as iets goeds.”Dit ná die NHE-raad besluit het om ’n eenmalige uitbetaling van N$15 000 aan elke werknemer te weerhou, hoewel daar vanjaar daarvoor begroot is. Haakuria sê die NHE-raad het nie redes vir dié besluit verskaf nie en dat die bestuur se hande in die verband afgekap is.Onderhandelinge verlede jaar het die uitbetalings verseker. NHE voorsien moontlike finansiële probleme binne die volgende twee jaar, wat verhogings onvolhoubaar sal maak, sê hy.Die raad het egter die N$15 000 wat elke werknemer sou kry, gestop, sê Haakuria.Hy benadruk dat die vakbond die wetlike proses tot die letter volg. Die geskil is reeds by die ministerie van arbeid, nywerheidsontwikkeling en werkskepping ingedien. Die kantoor van die arbeidskommissaris het reeds ’n sertifikaat van ’n onopgeloste geskil uitgereik nadat bemiddeling onsuksesvol was. Volgens Haakuria het die NHE-bestuur sonder die raad se mandaat die onderhandelinge bygewoon. Terselfdertyd moes 30 dae volgens wetgewing eers verstryk, en in daardie tyd het die werknemers hul eis vir die uitbetaling tot N$10 000 elk verlaag. Volgens hom sou die raad hierdie nuwe aanbod slegs kan oorweeg nadat die staatsonderneming se ouditverslag vir die 2021-’22-boekjaar ingedien is. Haakuria sê egter dat ouditeure nooit die onderneming se boeke vir 2019, 2020, 2021 en natuurlik 2022 onder oë gehad het nie.Ná volgehoue druk wat die vakbond verlede jaar toegepas het, het die NHE se bestuur begin om uitstaande finansiële verslae vanaf 2016 te voltooi, en het tot by 2018 gevorder, volgens die PSUN-leier. “Hoe begin jy by 2022 as die vorige jare nog nie gedoen is nie? Dit is bloot ’n vertragingstaktiek om te verseker dat die werknemers nie bevoordeel word nie,” sê hy.Volgens hom straf die raad die werknemers in plaas van die onbevoegde bestuur, wat nie boek kan hou nie. “Diegene in beheer word heraangestel. Die uitvoerende hoof is eens op ’n tyd geskors oor ’n sakeplan wat nie ontwikkel is nie. “By NHE is dit elke dag Kersfees vir die bestuur. Hierdie nuutste is opsetlik gedoen, nadat hulle verlede jaar kontantskenkings aan plaaslike owerhede gegee het. Hoekom was finansiële verslae nie toe nodig nie?” wil hy weet. Oor die NHE-raad, sê Haakuria hy weet nie wie is op die raad nie aangesien hy die raadslede nog nooit ontmoet het nie. Die voorsitter van die raad is Sam Shivute, ook die uitvoerende hoof van die Namibiese Inkomste-agentskap (NamRA). Haakuria sê Shivute en sy NHE-raad toon ’n veragtelike houding teenoor werknemers. Vrae wat die koerant gister aan Shivute gestuur het, was teen druktyd nog onbeantwoord. – augetto@republikein.com.na

NHE-werkers stem vandag oor staking

Kommentaar

Republikein 2026-05-04

Meld asseblief aan om kommentaar te lewer

NHE-werkers stem vandag oor staking

Kommentaar

Republikein 2026-05-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.