Nekundi daag nie op vir spoedhobbel-petisie

Betogers teen die nuwe spoedhobbels op Windhoek se westelike verbypad dreig om die besige roete te sluit, nadat die minister van werke en vervoer, Veikko Nekundi tydens ‘n betoging Saterdag nie opgedaag het vir die oorhandiging van ‘n petisie nie. 

Die betoging wat deur aktiviste en motoriste georganiseer was in kritiek teen die onlangs geïnstalleerde spoedhobbels op die B1-snelweg, het dosyne deelnemers gelok wat frustrasie uitgespreek het oor die omstrede maatreëls wat onder meer ten doel het om voetgangers te beskerm.

Die aktivis en organiseerder Michael Amushelelo sê betogers wou hê dat die owerhede die strukture wat hulle as gevaarlik en onwettig beskou, van die hoëverkeer-roete verwyder.

“Ons is hier om teen die onwettige installering van spoedhobbels te betoog,” het Amushelelo gesê. 

“Hierdie hobbels is nie veronderstel om op enige snelweg of deurpad te wees nie.”

Volgens hom sou die petisie wat deur 16 000 bekommerde inwoners onderteken is, Saterdag tydens die betoging aan Nekundi oorhandig word.

“Ons het hom Maandag in kennis gestel. Ons het verwag dat die minister sou kom en die petisie sou ontvang,” het hy gesê. 

“Maar hy het nie opgedaag nie.” Volgens die organiseerders het die minister se afwesigheid beteken die petisie kon nie oorhandig word nie. 

Die ministerie het teen die tyd van publikasie nog nie gereageer op vrae wat deur Republikein oor Nekundi se afwesigheid gestuur is nie.

ONGELUK

Amushelelo het verder aangevoer dat die spoedhobbels beide veiligheids- en finansiële risiko's vir motoriste inhou. 

“Ons maak nie grappe nie. Dit is mense se lewens wat in gevaar gestel word,” het hy gesê. 

“Enige gegewe dag is hierdie pad 'n lokval vir padgebruikers.”

Hy het ook gevra waarom alternatiewe veiligheidsmaatreëls vir voetgangers nie voorkeur gekry het nie. 

“Ons motoriste betaal vir padgebruik. Waarom is dit so kompleks om 'n oorhoofse brug te bou sodat voetgangers veilig die pad kan oorsteek?”

Vroeër die Saterdag is 'n ongeluk naby die Windhoek Buitekluboord op die westelike verbypad aangemeld wat Amushelelo aan die teenwoordigheid van die spoedhobbels toegeskryf het.  

“Daar was vanoggend nog 'n ongeluk wat noodlottig kon gewees het. Wat het dit veroorsaak? Hierdie spoedhobbels.”

Een van die betogers Bartho Harmse het gesê die betogers wou hul “teenkanting en kommer” uitspreek oor die installering en behoud van spoedhobbels op die besige roete. 

Hy het Nekundu daarvan beskuldig dat hy op die wydverspreide openbare protes gereageer het deur nog spoedhobbels op te rig. Volgens hom het dit groot kommer oor weinig verantwoordbaarheid onder senior regeringsamptenare uitgelig. Harmse se boodskap aan die regering is om “in plaas daarvan om tientalle miljoene Namibiese dollars aan paleise vir die presidente te bestee”, dit eerder gebruik moet word om voetgangerpaaie vir mense te bou. 

TELEURGESTELD

Die protes sou aanvanklik tot 18:00 duur, maar moes weens die polisie vroeër eindig wat vereis het dat betogers teen 11:00 die byeenkoms moes beëindig.

'n Dringende hofbevel wat laat Vrydag verkry is, het die betoging toegelaat om tot 13:00 te duur.

Een van die organiseerders van die protes wat naamloos wou bly, het gewaarsku dat motoriste hul optrede weens die minister se versuim om op te daag, verder kan uitbrei. 

“Ons is baie teleurgesteld oor die minister se versuim om op te daag,” het sy gesê. 

“Ons het beplande opsies gehad: óf ons gaan onder polisiebegeleiding na sy kantoor om die petisie af te lewer óf ons blokkeer die pad in 'n daad van burgerlike ongehoorsaamheid.”

Volgens haar word ‘n “algehele stilstand” beplan. 

Ondersteuners van die spoedhobbels is dit egter eens dat die installering nodig is om voetgangers te beskerm en spoed langs die roete te beperk. 

“Die verwydering van spoedhobbels sal nie outomaties ongelukke uitskakel nie,” het een motoris gesê. 

“Die oplossing lê in die verandering van bestuurders se gedrag en die gehoorsaamheid aan padreëls.” - [email protected]